Oblystyq ekologiia departamenti «QazAzot» AQ qorshaǵan ortaǵa 13 837 169 teńge kóleminde shyǵyn keltirdi dep sanaidy. Sot sheshimimen mekemege 1 742 029 teńge ákimshilik aiyppul salyndy, dep habarlaidy "Ult aqparat".
Bul týraly MO Ekologiia departamentiniń basshysy Rýslan Tókenov málimdedi. Onyń aitýynsha, QOS-1 jáne Qoshqar ata qaldyq kólin qosatyn sý arnasynan jaǵymsyz iis shyǵyp, turǵyndar ekologiia departamentine shaǵym túsirgen. Atalǵan kanal qalanyń tómengi bóliginen tazartylǵan kárizdik sýdy aǵyzýǵa arnalǵan. Maýsym aiynan bastap mamandar zerthanalyq tekserýler júrgizgen. Tiisti synamalar alǵan. Nátijesinde ammiaktyń shekti ruqsat etilgen kontsentratsiiasynan edáýir asyp túskeni kórsetilgen. Aýadan da osyndai himiialyq iis taralǵan. Anyqtai kele, kanalǵa basqa qubyrdan sarqyndy sý tógilgeni belgili boldy.
«Aǵyndy sýdyń qaidan quiylǵanyn anyqtaý úshin, kólemi 20 ga jer bederi 0,5 m-den keiin TS-407 elektrondy taheometriniń kómegimen kóldeneń qimasymen M 1:500 topografiialyq túsirilim júrgizildi, al injenerlik kommýnikatsiialar jer asty qubyr jáne kabelderdi anyqtaityn rd-4000 izdeýshi quraly arqyly tekserildi. Nátijesinde sarqyndy sýlar tógilgen qubyr »QazAzot«AQ-ǵa jatatyny anyqtaldy (jobaǵa sáikes qubyr tek qana jer asty sýlaryn aǵyzýǵa arnalǵan)»,-deidi Rýslan Tókenov.
Osyǵan bailanysty, ekologiia departamenti «QazAzot»AQ-ǵa qatysty jospardan tys tekserý júrgizgen. Belgilengen tekserý nátijeleri boiynsha óndiristik-sarqyndy sýlar aǵyzylǵan.
«Departamentpen Qazaqstan Respýblikasynyń Ákimshilik quqyq buzýshylyq týraly kodeksiniń 324, 325, 328 jáne 332-baptary boiynsha 4 ákimshilik is qozǵalyp, osy ekologiialyq quqyq buzýshylyqtar sot sheshimderimen dáleldendi. Sot organymen jalpy somasy 1 742 029 teńgege ákimshilik jaza qoldanyldy, al ekologiia departamenti usynǵan jalpy shyǵyn somasy 13 837 169 teńgeni qurady. Qazirgi ýaqytta Departament óndiristik sarqyndy sýlardy aǵyzýdy, tiisinshe osy óndiristik sarqyndy sýlar tógilgen jalǵanǵan qubyrdy bólshekteý týraly sotqa talap aryz daiyndaidy»,-deidi sala basshysy.
