Askar Mýratýly. Foto: qaj.kz
"QazAvtoJoldyń" burynǵy basshysy 8 jylǵa bas bostandyǵynan aiyryldy, - dep habarlaidy Ult.kz.
Resmi derekterge súiensek, is boiynsha eki adam aiyptalǵan, olardyń biri - "QazAvtoJol" basqarmasynyń burynǵy tóraǵasy.
"Qylmystyq tergeý organy M. jáne J-ny aldyn ala sóz bailasý arqyly, qyzmet babyn paidalana otyryp, asa iri mólsherde senip tapsyrylǵan múlikti iemdený jáne jymqyrý (QK 189-babynyń 4-bóligi, 2-tarmaǵy) boiynsha aiyptady. Tergeý barysynda M. men J. 2000 jyldardan beri tanys ekeni anyqtaldy. Sottalýshy M. 2017-2019 jyldary Aqmola oblysynyń jolaýshylar kóligi jáne avtomobil joldary basqarmasyn basqarǵan, 2019-2021 jyldary oblys ákiminiń orynbasary qyzmetin atqarǵan jáne Jaqsy-Esil-Buzýlyq avtojolyndaǵy Esil ózeniniń ústindegi kópirde oryn alǵan máselelerden habardar bolǵan", - delingen sot habarlamasynda.
2019 jyly M. Aqmola oblysy ákiminiń orynbasary qyzmetine taǵaiyndaldy. Sol jyly "QazAvtoJol" AQ-nyń Aqmola filialy men J. basqarǵan "Asyl-JAS" JShS arasynda atalǵan kópirdi jóndeý boiynsha quny 2,2 milliard teńgeni quraityn kelisimshart jasalǵan. Sotta bul qarajat merdigerge aýdarylmaǵany anyqtaldy.
2021 jyldyń sáýirinde M. "QazAvtoJol" ulttyq kompaniiasynyń basqarma tóraǵasy bolyp taǵaiyndalǵan. Al maýsym aiynda tapsyrys berýshi bastamasymen kelisimshart buzylyp, merdiger "Asyl-JAS" JShS bul sheshimge sot tártibimen shaǵymdanbaǵan.
"2021 jyldyń shilde-tamyz ailarynda M. men J. jáne basqa da múddeli tulǵalardyń qatysýymen jinalys ótkizip, "Asyl-JAS" JShS-men bir kózden satyp alý tásili arqyly kelisimshart jasaý máselesin kótergen. Mundai jinalys ótkizýge esh negiz bolmaǵan. J. tarapynan jazbasha ótinish túspegen. 2021 jylǵy 20 qazanda M. "Asyl-JAS" JShS-nyń basshysy J-nyń "QazAvtoJol" kompaniiasyna 2019 jyly buzylǵan kelisimshart boiynsha qaryzy bar degen syltaýmen sotqa shaǵym túsirýi múmkin ekenin alǵa tartyp, bir kózden satyp alý tásili arqyly Dike konsortsiýmymen jáne "Asyl-JAS" JShS-men 2,2 milliard teńgeden astam somaǵa jańa kelisimshart jasaý týraly zańsyz buiryq shyǵarǵan", - delingen sot habarlamasynda.
Sotta anyqtalǵandai, 2020 jyldyń 21 qańtary men 2021 jyldyń 7 qazanyndaǵy sot sheshimderi boiynsha "Asyl-JAS" JShS jáne Dike JShS-na ońaltý rásimderi qoldanylǵan, olardyń qaryzdary tiisinshe 264 million jáne 685 million teńgeden asqan. Konsortsiým músheleriniń qarjylyq turaqsyzdyǵy jáne kelisimshartty oryndaý múmkindiginiń bolmaǵany da anyqtaldy.
"2021 jylǵy 21 qazanda M-nyń buiryǵyna sáikes Aqmola filialy konsortsiýmmen kelisimshart jasasty. 2021 jylǵy 28 jeltoqsanda kelisimshart aiasynda "Asyl-JAS" JShS-nyń esepshotyna 200 million teńge avans aýdarylyp, ol M. men J. tarapynan jymqyrylǵan", - dep habarlady sot.
Memleketke keltirilgen shyǵyn ótelmegen. Aiyptalýshylar kinásin moiyndamaǵan jáne olardy aqtaýdy suraǵan.
"Qylmystyń aýyrlyǵy, memleketke keltirilgen asa iri mólsherdegi shyǵynnyń ótelmeýi, jeńildetetin jáne aýyrlatatyn jaǵdailardyń bolmaýy eskerilip, sot mynadai úkim shyǵardy: M. ("QazAvtoJoldyń" eks-basshysy) - 8 jylǵa bas bostandyǵynan aiyrý, memlekettik qyzmette jáne kvazimemlekettik sektor sýbektilerinde ómir boiy qyzmet atqarý quqyǵynan aiyrý. J. - 8 jylǵa bas bostandyǵynan aiyrý, múlkin tárkileý jáne qarjy men kommertsiialyq uiymdarda 10 jyl boiy basshylyq qyzmet atqarý quqyǵynan aiyrý. "QazAvtoJol" ulttyq kompaniiasynyń azamattyq shaǵymy qanaǵattandyryldy", - delingen sot úkiminde.
Úkim zańdy kúshine engen joq.
