Foto: qaj.kz
«QazAvtoJol «UK» AQ Basqarma tóraǵasy Meiirhat Qasymbaev óz sheshimimen qyzmetinen ketkenin málimdedi, dep habarlaidy "Ult aqparat".
"Qurmetti dostar, qadirli áriptester! Búgin jeke sheshimime sáikes "QazAvtoJol "UK" AQ Basqarma Tóraǵasy qyzmetin aiaqtadym. Eki jylǵa jýyq ýaqyt ishinde áriptesterimmen birlese qurylysy uzaqqa sozylǵan joldardy qolǵa alyp, jobalardy aiaqtaý úshin aianbai eńbek ettik.
Úlken jumys atqaryldy. Búgingi tańda respýblikalyq avtojoldar jelisinde jumysy toqtap turǵan birde-bir jol jobasy joq dep senimmen aita alamyn. Sońǵy eki jyl ishinde 7 mln tonna asfalt tóseldi. Bul degenimiz - shamamen 2,5 myń shaqyrym jol jańa asfaltpen qamtyldy degen sóz.
El aýzynda júrgen Atyraý-Astrahan, Qaztalov-Jánibek-RF shekarasy, Ónege-Bisen-Saihyn kúre joldarynda jumystar qaita bastaldy. Bul joldardyń qurylysy aiaqtalýǵa jaqyn. Aqtóbe-Qandyaǵash, Úsharal-Dostyq, Taldyqorǵan-Qalbataý-Óskemen, Qaraǵandy-Balqash, Kúrti-Burylbaital, Merki - Burylbaital jáne t. b. baǵyttarda asfalt tóselip, jol qozǵalysy ashyldy" - dep jazdy ol Instagram-daǵy paraqshasynda.
Sondai-aq Qasymbaev Memleket basshysynyń tapsyrmasyna sáikes biryńǵai avtojol kompaniiasyn qurý aiasynda jumys júrgizilgenin atap ótti.
"Jyl saiyn materialdyq-tehnikalyq baza men arnaiy jol tehnika parki jańartylyp otyrdy. Arnaiy tehnika sanyn 400 birlikke arttyrdyq. Bul joldardy kútip-ustaý jumystarynyń sapasyn edáýir jaqsartýǵa múmkindik beredi.
Jasyratyny joq, avtojol salasy Memleket basshysynyń tarapynan da, turǵyndarymyzdyń tarapynan da birneshe ret synǵa ushyrady. Joldyń máselesi bir kúnde sheshilmeidi. Oń ózgeriske qol jetkizý úshin júieli túrde jumystaný kerek. Prezidenttiń tapsyrmasyna sáikes byltyrdan beri salany reformalaý úshin birqatar shara qabyldanyp jatyr. Óz tarapymyzdan sheteldik tájiribege súiene otyryp, quzyretti organdarǵa birqatar usynys joldadyq.
Jolshynyń mamandyǵy kabinette otyrmai, únemi qurylys basynda bolýdy talap etedi. Bul qaǵidany saqtadyq.
Áriptesterime, jumysyna adal qaraǵan merdigerlerge jáne kúndiz-túni jolda júrgen árbir jolshy mamanǵa alǵys aitamyn!" - dep túiindedi eks-tóraǵa.
