Elimizde Covid-19-ǵa arnalǵan dári-dármekpen qamtamasyz etýge qatysty birqatar sharalar qabyldandy. Bul týraly Ortalyq kommýnikatsiialar qyzmeti alańynda «QR DSM ózekti máseleleri: Pandemiia kezindegi meditsinalyq kómektiń qol jetimdiligi týraly» taqyrypta ótken onlain brifingte aityldy, dep habarlaidy QazAqparat.
«Koronavirýstyń taralý qaýpiniń aldyn alý úshin birqatar sharalardy qolǵa alamyz. Koronavirýstyń jańa tolqyny bola qalǵan jaǵdaida elimiz boiynsha 70 000 oryn qarastyrýǵa daiynbyz, onyń 51 myńy statsionarlarda Covid-19-ǵa arnalǵan oryndar. Dári-dármekpen qamtamasyz etýge qatysty birqatar sharalar qabyldandy. Covid-19-ǵa arnalǵan dári-dármekterdi 2 aiǵa artyǵymen alyp qoidyq, ol aimaqtarǵa taratylyp qoidy. Onyń quny 11,4 milliard teńge. Barlyq aimaqta eń qajetti degen dári-dármekter úshin 13 milliard teńge kóleminde turaqtandyrý qory quryldy. Ambýlatoriialyq deńgeidegi dári-dármekter tizimi ulǵaidy. Covid-19-ǵa arnalǵan taǵy 5 dári qosyldy», - deidi QR Densaýlyq saqtaý ministri Aleksei Tsoi.
Onyń aitýynsha, koronavirýsty úide emdeý úshin 1 million naýqasqa arnalǵan tegin dári-dármek qarastyrylǵan.
«Sondai-aq, 2,2 million teńgege tumaýǵa qarsy vaktsina satyp alyndy. Vaktsina egý 15 qyrkúiekten bastaldy. Qazirgi ýaqytqa deiin 1 millionǵa jýyq adamǵa ekpe jasaldy. Infektsiialyq jáne provizorlyq statsionarlarda 3379 ókpeni jasandy jeldetetin apparat bar. Qosymsha 2 619 dana osyndai apparat satyp alynady, onyń ishinde 1 500 apparat otandyq ónim. 21 myń oryn ottegimen qamtamasyz etildi, qazan aiynyń sońyna deiin qosymsha 9 000-nan astam oryn ottegimen qamtamasyz etiledi. Aýdandyq aýrýhanalarǵa elimizde shyǵarylǵan qosymsha 53 rentgen apparaty alynady. Jedel járdem qyzmeti 1 167 dana sanitarlyq avtokólikpen qamtamasyz etiledi. Aýyldaǵy halyqtyń meditsinalyq qyzmetke qoljetimdiligi 100-ge jýyq jyljymaly meditsinalyq keshendi satyp alýmen júzege asyrylady. Ol aýdandarǵa qazan aiynyń ortasyna deiin jetkiziledi», - deidi ol.
