Foto: Májilis
Májilis depýtaty Anas Baqqojaev jasandy intellekti jappai qoldaný adamdardy degradatsiiaǵa aparady dep esepteidi. Bul týraly depýtat Májilis otyrysynda aitty, dep habarlaidy Ult.kz.
"Men óz basym jasandy intellektke óte abai qaraimyn. Shyn máninde, keide qorqamyn. Sebebi myna intellektýaldyq degradatsiiaǵa aparýdyń joly bul. Adam ózi oilanyp jazbasa, kompozitor mýzykasyn shyǵarmasa, bul ne zaman bolyp bara jatyr? Sonda biz álem jasandy intellekt jasady eken dep, sońynan ere beremiz be? Bizdiń qazaqylyǵymyz qaida? Bizdiń ózimizdiń intellektýaldyq múmkindikterdi ashatyn joldar qaida? Ótken joly bir sheneýnik ChatGPT degenge óziniń materialdaryn salyp otyr. Sondaǵy onyń maqsaty bastyǵym tezirek basymnan sipasa eken, bergen tapsyrmany tezirek oryndaiyn degen. Ol miyndaǵy qatparlaryn qozǵaltqysy kelmeidi. Bul "alma pis, aýzyma tús" degen jalqaý sheneýnikterge jaqsy boldy. Al endi ChatGPT-diń ár jaǵynda kim benefitsiar? Ol materialdy jinap, erteń ózimizge qarsy paidalanbaitynyna kim kepil?", – dedi depýtat.
Osylai degen depýtat Tsifrlyq damý ministrligi men Ulttyq qaýipsizdik komitetine saýal joldady.
"Ministrlikterde, memlekettik organdarda jasandy intellektiń paidalanýyn kim qadaǵalap jatyr? Qaida ol qadaǵalaý? Bar ma, joq pa? Qanshama materialdar ketip qalǵan. Erteń sonyń bárin ózimizge qarsy paidalanbasyn kim biledi?", – dedi májilismen.
Tsifrlyq damý, innovatsiialar jáne aeroǵarysh ónerkásibi birinshi vitse-ministri Qanysh Tóleýshinniń sózinshe, osy jyldyń aiaǵyna deiin búkil memlekettik organdarda 50-ge jýyq jasandy intellekt sheshimderi assistent retinde ázirlenetin bolady.
Ulttyq qaýipsizdik komitetiniń ókili Dáýren Alsheriev depýtat kóterip otyrǵan másele óte mańyzdy ekenin aitty.
"Osy zań jobasynda táýekelge ákeletin suraqtardyń basym bóligin jabýdy qarastyrýymyz kerek. Negizi jańa tehnologiia engizilgende táýekelder barlyq kezde bolady", – dedi ol.
"Biz ol zańdy aldaǵy ýaqytta qabyldai jatarmyz. Biraq dál qazir shekteý qoiý kerek", – dedi Májilis depýtaty Anas Baqqojaev.
