Foto: Instagram.com
Jýrnalist ári qoǵam belsendisi Baýyrjan Babajanuly óziniń áleýmettik jelidegi paraqshasynda ózgeshe formatta ótken qyz uzatý toiyna tánti bolǵanyn jazdy, dep habarlaidy Ult.kz.
Onyń aitýynsha, Qanat pen Sveta qyzdary Raýshandy uzatqan saltanat — burynǵy toilardyń qalyptasqan úlgisin túbegeili ózgertken áserli oqiǵaǵa ainaldy.
«Qazaqtyń toiyna reforma jasaý kerek» dep aitylyp júrgenine biraz boldy. Talai talpynys nátijesiz aiaqtaldy. Biraq keshegi toi bul pikirdiń jańsaq ekenin dáleldedi. Toi formatyn ózgertýge bolady eken», – dedi ol.
Toida kópshiliktiń mikrofonǵa júgirip, kezekpen tilek aitý dástúri bolmaǵan. Onyń ornyna júrgizýshiler ár ústelge baryp, ondaǵy qonaqtardy jeke tanystyryp, ekrannan kórsetken. Ár ústel gúl ataýymen atalyp, erekshe atmosfera qalyptasty.
Raýshannyń ómiri men ata-anasynyń perzentine degen yqylasy ekran arqyly berilgen beinejazbada shynaiy jetkizilgen. Sondai-aq qazaqtyń qyz uzatý dástúrine qatysty tarihi derekter de beine arqyly kórsetilip, jiylǵan jurttyń yqylasyna bólendi.
«Toi ieleri qysqa sóiledi. Esesine ekrannan aqjarma tilekter berildi. Bul riiasyz, shynaiy áserge toly erekshe sheshim boldy», – dep jazdy Baýyrjan Babajanuly.
Toidyń sharyqtaý shegi – Dimash Qudaibergenniń arnaiy jazǵan "Qarlyǵashym uia salǵanda" áni boldy. Bul sátte kóz jasyna erik bermegender az bolmaǵan.
Raýshan men Ermahannyń mahabbat hikaiasy kórkem filmge bergisiz beinekórinis retinde usynylyp, qonaqtardyń erekshe yqylasyn týdyrdy. Toidyń qalai ótip ketkenin qonaqtar tún jarymynda bir-aq ańǵarǵan.
«Kete almai esik aldynda turyp alyp, áserlerin bólisken adam qanshama?!» – dep túiindedi ol jazbasyn.
Jýrnalisttiń aitýynsha, bul toi kópshilikke jańa úlgi, jańa shabyt syilaǵan aitýly oqiǵa boldy.
