Qazaqtyń osy klassikalyq ónerinen etnos ókilderi baq synaityn joǵary deńgeidegi baiqaýlar uiymdastyrylýy tiis. Bul baiqaýlardyń bas júldesi aitysqa tigiletin kólikpen birdei bolmasa, kem bolmaýy kerek. Bul týraly «Uly dalanyń ultaralyq tili» respýblikalyq forýmynda QR Ulttyq gvardiiasy án-bi ansambliniń kontsertmeisteri Denis Iakovlev aitty, dep habarlaidy QazAqparat.
«Men 1991 jyly Qostanai oblysy, Amanqaraǵai aýylynda týǵanmyn. Ulttym – orys. N. Ostrovskii atyndaǵy orta mektepti bitirdim. Qazir Ahmet Baitursynov atyndaǵy Qostanai aimaqtyq ýniversitetinde oqimyn. Men bala kezimnen án aitamyn. Alǵashqy ret úlken sahnada, qazaq tilinde Batyrhan Shúkenovtiń «Otan ana» ánin oryndadym. Ol kezde segizinshi synypta oqityn edim. Bul ándi maǵan marqum ustazym Serebrov Valerii Anatolevich úiretti», - deidi Denis Iakovlev.
Ol qazaqsha sóileýdi áskerde úirengenin aitty.
«Áskeri orta maǵan barynsha kómektesti. Qarýlas dostarym jaqyn tartyp, menimen qazaq tilinde sóilesti. Qazaq tilinde qalai sóilep ketkenimdi ózim de baiqamai qaldym. Biraq úirenetinim áli de kóp. Eń qyzyǵy, áskerden keiin mýzykalyq kolledjge túskim kelgen kezde, men tandaǵan mamandyq boiynsha tek qazaq toby boldy. Sosyn men nar táýekel dep kózimdi jumdym da túsip kettim. Til úirengenimniń arqasynda, ómirimde kóptegen ózgerister oryn aldy. Tyndaýshylarymnyń aiasy da, dostarym da kóbeidi. Qyzmet atqarý barysynda respýblikalyq áskeri ánder konkýrsyna qatysyp, 2-orynǵa ie boldym. Keiin, osy jetistikter Ulttyq ulan án – bi ansambline qyzmetke turýǵa kómektesti. Qazir meniń repertýarymda kóp qazaqsha ánder bar. Olardyń ishinde: halyq ánderi, avtorlyq ánder, taǵy operadan úzindiler bar», - deidi ol.
Onyń aitýynsha, endigi maqsaty – ulttyq ónerimizdi dáriptep, qazirgi jastarǵa nasihattap, durys baǵytta kórsetip, sony júrekterine jetkize oryndaý.
«Ulttyq ónerimizdi, mádenietimizdi, dástúrli ánderimizdi jii nasihattaýymyz kerek. Óitkeni qazaqtyń sóz qudireti, sóz marjany – ulttyq klassikalyq ánderdiń mátininde jatyr. Qazaqtyń osy klassikalyq ónerinen etnos ókilderi baq synaityn joǵary deńgeidegi baiqaýlar uiymdastyrylýy tiis. Bul baiqaýlardyń bas júldesi aitysqa tigiletin kólikpen birdei bolmasa, kem bolmaýy kerek. Bul óz kezeginde ózge etnos jastaryna qazaqtyń óneri men tilin bilýge, úirenýge dańǵyl jol ashady dep oilaimyn», - deidi Denis Iakovlev.
