Foto: Inbusiness.kz
Almatyda «Elge kómek» qorynyń jetekshisi, halyq arasynda «qazaq Robin Gýdy» atalyp ketken bloger Iliias Sárievke sot úkimi shyqty. Ol birneshe ret jasalǵan alaiaqtyq úshin kináli dep tanylyp, úsh jyl segiz aiǵa bas bostandyǵynan aiyryldy, dep habarlaidy Ult.kz.
4 jeltoqsanda Almaly aýdandyq sotynda bloger Iliias Sárievke qatysty is qaraldy. Sot ony Qazaqstan Respýblikasynyń Qylmystyq kodeksiniń 190-baby, 3-bólimi, 4-tarmaǵy boiynsha – «Qaitalanyp jasalǵan alaiaqtyq» deregimen kináli dep tapty.
Sýdia Ernar Qasymbaev oǵan ortasha qaýipsizdik deńgeiindegi túzetý mekemesinde úsh jyl segiz ai bas bostandyǵynan aiyrý jazasyn taǵaiyndady.
Alǵashqyda sot tórt jyl segiz ai merzim belgilegen. Alaida amnistiia qoldanylǵan soń jaza bir besinshi bólikke qysqartylyp, aqyrǵy merzim úsh jyl segiz ai bolyp bekitildi. Iliias Sárievke qatysty 20 epizod boiynsha aiyp dáleldenbedi, alty epizod boiynsha kináli dep tanyldy.
«Amnistiia aiasynda sot úsh jyl segiz aidan artyq merzim taǵaiyndai almaidy – zańda mundai múmkindik qarastyrylmaǵan. Bul – zańmen belgilengen eń joǵarǵy shek. Sondyqtan sot tym jeńil jaza berdi dep oilaýdyń qajeti joq», – dedi sýdia Ernar Qasymbaev.
Bul is boiynsha ekinshi aiyptalýshy – Aktoty Dúiseeva. Sot oǵan Qazaqstan Respýblikasynyń Qylmystyq kodeksiniń 74-babyna sáikes jaza óteýdi keiinge qaldyrýdy qoldandy. Bul bap jas balasy bar áielderge osyndai múmkindik beredi.
Alǵashqyda oǵan tórt jyl alty ai bas bostandyǵynan aiyrý jazasy belgilengen. Amnistiiadan keiin merzim úsh jylǵa qysqartyldy. Jaza 2028 jylǵa deiin keiinge qaldyryldy – sol ýaqytqa deiin onyń balasy 14 jasqa tolýy tiis. Osy kezeńde ol probatsiialyq baqylaýda bolady.
Sońǵy sózinde Iliias Sáriev kózine jas alyp, ózin qylmys quramynyń bolmaýyna bailanysty aqtaýdy surady. Al Aqtoty Dúiseeva kinásin moiyndap, jazasyn keiinge qaldyrýdy jáne amnistiiany qoldanýdy ótindi.
