Elimizde qasietti qara dombyraǵa degen qurmet eshqashan tómendegen emes. Bul týraly búgin Astanada Ulttyq dombyra kúnine arnalǵan kontsertte Memleket basshysy Nursultan Nazarbaev málim etti, dep habarlaidy QazAqparat.
«Rýhani jańǵyrý baǵdarlamasy arqyly ulttyq mádenietimizdi álemge tanytýǵa dombyra erekshe úles qosady. Qurmanǵazy men Dáýletkereidiń, Táttimbet pen Súgirdiń, Qazanǵap pen Dinanyń kúileri tól mádenietimizdiń biregei úlgileri. Keshegi aramyzdan ótken Nurǵisa Tilendiev dombyra arqyly óziniń óshpes ónerin qaldyrdy. Olardyń barlyǵy urpaqtan-urpaqqa jalǵasyp, halyqtyń jadynda saqtalyp keledi. IýNESKO sheshimimen dombyra men kúi adamzattyń materialdyq emes mádeni muralarynyń tizimine endi. Elimizde qasietti qara dombyraǵa degen qurmet eshqashan tómendegen emes. Osydan biraz jyl buryn Astanada kúi atasy Qurmanǵazynyń eskertkishi boi kóterdi. Almatyda áigili Nurǵisa Tilendievtiń eńseli eskertkishi ornatyldy. Osynyń bári dombyra men kúi ónerimen ǵasyrlar boiy dalamyzdy sazben terbetken kúishilerdi qadirleýdiń kórinisi», - dep toqtaldy Elbasy.
Sondai-aq, Memleket basshysy dombyra qazaq úshin jai ǵana mýzykalyq aspap emes, odan áldeqaida biik turǵan kieli qundylyq ekenin atap ótti.
«Halqymyz dombyraǵa úki taǵyp, tórine ilgen. Kúishilerdi tóredei kútip, tóbesine kótergen. Osy igi úrdis qazir de jalǵasyp keledi. Búgin «Qazaq Eli» alańyna jinalǵan myńdaǵan kúishi osynyń aiqyn kórinisi. Rýhani jańǵyrýǵa bet burǵan halqymyz qasietti dombyra men qudiretti kúidi qazaq qanshalyqty qadirleitinin búkil elimizge, barsha álemge pash etip otyrmyz. Osy jerde kúmbirlegen kúiler bizdiń biregeiligimiz ben rýhani tutastyǵymyzdy bildiredi. Ylaiym ár ýaqytta elimizge Jaratqan birlik bersin. Búgingi shara óskeleń urpaqtyń qasietti dombyraǵa, ulttyq ónerge degen qulshynysyn arttyra túsedi dep bilemin. Ulttyq dombyra kúni barshamyzǵa qutty bolsyn!», - dep quttyqtaýyn jetkizdi Prezident.
Budan buryn habarlanǵandai, Elbasy 2 myńnan astam dombyrashynyń ónerin tamashalady.
Sonymen qatar Memleket basshysy dombyra - qazaqtyń brendi men pasporty ekenin atap ótti.
.jpeg)