Nursultan Nazarbaev qory janyndaǵy Memlekettik tildi damytý qory QR Tuńǵysh Prezidenti – Elbasy mýzeiinde «Uly dalanyń ańyzdary» toptamasymen shyqqan jańa komiksterdiń tusaýkeserin ótkizdi, habarlaidy QazAqparat tilshisi.
«Eńlik-Kebek», «Estai-Qorlan», «Qozy Kórpesh–Baian sulý», «Jumbaqtas», «Aisha bibi», «Shaitankól», «Balqash».
«Uly dalanyń ańyzdary» degen atpen shyǵarylǵan qazaq komiksteriniń jańa toptamasyna qazaq aýyz ádebietiniń osyndai týyndylary enipti.
Uiymdastyrýshylar komikster jelisimen túsirilgen kórkem fotosýretter kórmesin de usyndy.
«Joba Elbasynyń «Uly dalanyń jeti qyry» atty baǵdarlamalyq maqalasyn iske asyrý aiasynda qolǵa alynǵan. Bul jolǵy toptamaǵa qazaq dalasyndaǵy jeti liro-epostyq jyr men batyrlar týraly ańyzdardy ózek etip aldyq. Ondaǵy maqsatymyz –qazaqtyń tól folkloryn jas býynǵa zamanaýi tásildermen meńgertý. Mysaly, «Qozy Kórpesh – Baian sulý» eposynyń 89 betke sozylatyn nusqasy bar. Ony qazirgi blalar oqyp otyrmaityny túsinikti. Sony bizdiń jas aqyn-jazýshylar qysqasha mazmunap, eń negizi tustarynan dialogtar qurap, komikske ikemdep jazyp shyǵady. Sýretshiler sonyń jelisimen komiks salady. Ázirge komiks stsenariin Dosqan Jylqybaev degen jigit jazyp júr. Al sýretterin áýeldi Murat Dilmanov salyp bastaǵan. Qazir oǵan eki jas sýretshi qosyldy», - deidi Nursultan Nazarbaev qory janyndaǵy Memlekettik tildi damytý qorynyń direktory Azat Sháýeev.
Sondai-aq, ol bir erteginiń komiksi birden úsh tilde berilgenin aitty.
«Uly dalany uly mahabbaty» degen toptamamen qazaq folklorynda keń taraǵan jeti ǵashyqtyń jyryn, «Uly dalanyń batyrlary» degen toptamamen Er Tóstik pen Alpamystan bastap, Kenesarymen túiindeletin 7 batyrdy berdik. Batyrlar toptamasyn bertingi batyrlarǵa deiin túgel qamtymaqpyz. Odan keiin «Uly dala handary» jáne «Uly dalanyń arýlary» degen toptamalardy josparlap otyrmyz. Onda Tomiris pen Zarinadan bastap Áliia, Mánshúkterge deiingi tulǵalar qamtylady», - deidi Memlekettik tildi damytý qorynyń direktory.
Komikstiń elektrondy nusqasy arnaiy saitta tegin usynylǵanymen, úsh tildegi jinaq kitaby satylymǵa shyǵarylady.
«Búgin tusaýy kesilse, erteńnen bastap kitap dúkenderine túsedi. Shamamyz kelgenshe balalar kitaphanalaryna taratamyz. Bul komiksterdiń kóbi Qazaqstannyń kieli jerlerimen bailanysty. Bir jaǵynan osy kieli jerlerdi nasihattaý úshin komikster jelisimen Aiagóz, Jumbaqtas, Balqash siiaqty kieli oryndarǵa arnaiy baryp, kórkem fotosýretter túsirip qaittyq. Jobany Nursultan Nazarbaev qory qarjylandyryp otyr. Aldaǵy toptamalardy osy komiksterdi satýdan túsken aqshamen shyǵarsaq degen oi bar. Sondyqtan da kitaphanalarǵa jappai tegin tarata almaimyz. Tipti qyzyqqan adam bolsa, Qazcomics.kz saityna kirip, tegin tamashalai alady», - deidi Azat Sháýeev.
