Qazaqtyń bailyǵy men fin tehnologiiasyn túiindestirese, eki tarapqa da paidaly. Bul týraly búgin Qazaqstan Prezidentimen shaǵyn jáne keńeitilgen quramda kezdesý ótkizgennen keiingi birlesken málimdeme barysynda Finliandiia Prezidenti Saýli Niinistio aitty, dep habarlaidy QazAqparat tilshisi.
«Qazaqstan Ortalyq Aziiadaǵy mańyzdy eldiń biri jáne atalǵan óńirdegi Finliandiianyń saiasi jáne saýda-ekonomikalyq salalardaǵy basty seriktesi sanalady. Qazaqstan túrli tabiǵi resýrstar men bailyqqa ie bolyp otyr. Al Finliandiiada tehnologiia bar. Osynaý aspektilerdi túiindestirer bolsaq, eki tarapqa da barynsha tiimdi bolar edi», - dedi Finliandiia Prezidenti.
Sonymen qatar ol Finliandiia men Qazaqstan ózge de salalarda tiimdi yntymaqtastyqty jolǵa qoiǵanyn atap ótti.
«Bizge Qazaqstannan bilim jáne meditsina salalarynda tájiribe jinaý úshin kóptegen jastar keledi. Finliandiia álemde eń turaqty memleketterdiń birine qalai ainalǵandyǵy týraly málimetterimizdi de zor rizashylyqpen bólise alamyz», - dedi Saýli Niinistio.
Esterińizge sala ketsek, búgin Elbasy Finliandiia Prezidenti Saýli Niinistiomen shaǵyn jáne keńeitilgen quramda kezdesý ótkizdi.
Kezdesýden keiingi birlesken málimdeme barysynda Nursultan Nazarbaev Qazaqstan-Finliandiia biznesmenderi 600 mln dollardyń kelisimshartyn jasasqanyn, qazaq pen finniń tarihy da, taǵdyry da uqsas ekendigin, elimizdiń kólik áleýeti zor ekendigin basa aitty.
Sapar aiasynda Memleket basshysy keshe fin biznes kapitandarymen júzdesti.
Kezdesý barysynda Memleket basshysy Finliandiiadan Qazaqstan arqyly Qytaiǵa jańa temir jol baǵdary ashylatyndyǵyn aitty jáne fin kompaniialaryn elimizdegi agroónerkásiptik keshendegi jobalardy júzege asyrýǵa shaqyrdy.
Fin kompaniialary úshin Qazaqstannyń týrizm salasy da tartymdy ekenin, IT-kompaniialaryna da qolaily jaǵdai jasalatyndyǵyn atap ótti.
