QR Parlamenti Senatynyń tóraǵasy Dariǵa Nazarbaeva parlamenttik tyńdaýǵa daiyndyq aiasynda elimizdiń «Atameken» ulttyq kásipkerler palatasy men «QazAgro» ulttyq basqarý holdinginiń basshylarymen kezdesti. Bul týraly Senattyń baspasóz qyzmetinen málim etti, dep habarlaidy "Ult aqparat".
«Atameken» UKP Basqarma tóraǵasy Abylai Myrzahmetov kirispe sózinde agroónerkásip keshenin damytýdyń memlekettik úsh baǵdarlamasy aiasynda sýbsidiialaýǵa shamamen eki trillion teńge jumsalǵanyn, degenmen salanyń kórsetkishteri óspegenin ári álemdegi mejelerden aitarlyqtai artta qalǵanyna jinalǵandardyń nazaryn aýdardy.
A.Myrzahmetovtyń derekterinde bizdiń elimiz óńdelgen ónim boiynsha importqa kóbirek táýeldi bolyp otyr, óitkeni tiimdiligi tómen jáne odan ári óńdeletin shikizat retinde paidalanylatyn tiri mal eksporttyń negizgi bóligin quraidy. «Atameken» UKP basshysy bul jaǵdai memlekettiń azyq-túlik qaýipsizdigine teris yqpal etedi, dep sanaidy. Onyń aitýynsha, reformalardaǵy udaiy ózgerister aýyl sharýashylyǵy taýaryn óndirýshilerdiń kóńil-kúiine aitarlyqtai áser etedi.
«Sońǵy 5 jylda sýbsidiialaý erejeleri 47 ret ózgerdi. Bul turaqty sipatqa ie boldy. Udaiy ózgerister engiziledi, fermer jumysty qalai josparlaýdy túsinip úlgermeidi. Qujattardy daiyndaýdy bastaǵanda jarty jyldan keiin kelesi túzetýler engiziledi», - dedi ol.
Abylai Myrzahmetov memlekettik organdar arasynda úilesimniń joqtyǵyn da atap ótti:
Aýyl sharýashylyǵy ministrliginiń Jer resýrstaryn basqarý komiteti aýyl sharýashylyǵy jerleriniń balansyn ustaýshy bolyp sanalatynyna qaramastan, barlyq aktilerdi berýmen jergilikti atqarýshy organdar ainalysady, al ótken jyly himanalizdi berý Azamattarǵa arnalǵan úkimetke berildi. Bul bazany tártipke keltirý kerek».
Óz kezeginde «Atameken» UKP Tóralqasy Agroónerkásip komitetiniń tóraǵasy, agrofirma direktory Ivan Saýer mal sharýashylyǵyn damytýdy ne tejep otyrǵany týraly aityp berdi. Ol mańyzdy máselelerdiń biri retinde veterinariialyq qamtamasyz etý júiesiniń álsizdigi, dep sanaidy. Veterinariiadaǵy kóptegen reformalar eldegi veterinariialyq ahýaldy baqylaýdy álsiretti, ol janýarlardyń qaýipti aýrýlarynyń órshý jaǵdailary jiilep ketýinen baiqalyp otyr.
Esep-qisapqa qosyp jazý – jeke másele bolyp otyr. I.Saýer et óndirýdegi kórsetkishterdi kópe-kórineý asyra kórsetip, burmalaityndardy memleket jazalaýy tiis ekenin aitty.
Onyń oiynsha, et óndirisin damytý máselesinde «ár qiyrdan angýs etin izdeýdi qoiyp, otandyq tuqymdy damytý kerek», ásirese aimaqtyq erekshelikterge jaqsy beiimdelgen qazaqtyń aq bas siyryn ósirýdi qolǵa alǵan jón.
