Sport jýrnalisi Aslan Kajenov erkin kúreste Nurdáýlet Seiilbekov esimdi sportshyǵa qastandyq jasalyp jatqanyn aitty. Erkin kúresten álem chempionaty Albaniianyń Tiran qalasynda 21-27 qazan aralyǵynda ótedi, dep habarlaidy "Ult aqparat" Caravan.kz media portalyna silteme jasap.
Birer kún buryn Ulttyq olimpiadalyq komitettiń baspasóz qyzmeti álem chempionatyna qatysatyn Qazaqstan quramasynyń tizimin jariialady. Alaida, 74 kg salmaq dárejesindegi sportshy áli anyqtalmaǵanyn eskertken edi.
Erkin kúresten 74 kg salmaq dárejesindegi túsinispeýshilik Nurdáýlet Seiilbekov pen Mýrat Djakýpovtyń arasynda bolyp jatqany belgili boldy. Bul týraly Aslan Kajenov áleýmettik jelidegi paraqshasynda jazdy.
Nurdáýlet Seiilbekov degen kim?
Jýrnalist Aslan Kajenovtyń aitýynsha, jasóspirmder arasynda Aziia chempionatynda ekinshi, Álem chempionatynda úshinshi oryn alyp, keremet jeńisterimen qýantyp, jýyrda ǵana jastar arasyna qosylǵan sportshy. Sol jastar arasynda da Taldyqorǵan qalasyndaǵy irikteý básekesinde 74 kelige deiingiler arasynda qarsylas shaq keltirmei, aldaǵy dúniejúzilik dodaǵa qatysýǵa múmkindik alǵan.
Nurdáýletke qandai qiianat jasaldy?
Aslan Kajenovtyń sózine sensek, federatsiia basshylyǵy aldaǵy álem chempionatyna barlyq dodada top jarǵan Nurdáýletti emes daǵystandyq Mýrat Djakýpovty aparmaqshy.
"Biraq, kúres túrlerine jaýapty federatsiia, onyń ishinde, bapkerler quramy erkin kúresten álem chempionatyna Nurdáýletti emes, Daǵystannan kelgen Mýrat Djakýpovty alyp ketkisi keledi. Sebebi túsiniksiz. Nurdáýlet irikteý básekesiniń finalynda álgi kelimsekti jeńdi. Bizdiń balanyń qolyn kóterdi. Endi álem chempionatyna baram dep jigerlenip, búkil daiyndyǵyn soǵan baǵyttap jatqan balýanǵa taǵy da «prikidka» jasaiyq depti. Ne úshin? Nege onyń saǵyn syndyryp, taýyn shaǵasyzdar? Jeńip turǵan balaǵa «prikidka» ne kerek? Qazaqtyń osy qazaqqa ǵana áli jetedi. Ne úshin álgi legionerdi basqa kóteresizder? Nege ózimizdiń qarakóz onyń alynda tómendeýi kerek?", — dep jazdy ol.
Mýrat Djakýpov týraly ne belgili?
Ashyq derekkózderde sportshy týraly málimet asa kóp emes. Erkin kúreste 74 kg salmaq dárejesinde óner kórsetetin Mýrat Aliuly Djakýpov 2001 jyly Resei Federatsiiasynyń quramyndaǵy Cherkessk Respýblikasynyń Cherkessk qalasynda dúniege kelgen. 2020 jyly ótken Resei ishki birinshiliginde 21 jasqa deiingi jastar arasyndaǵy erkin kúresten qola júldege ie bolǵan. 2023-2024 jyldary ótken Qazaqstan chempionatynda da qola júldeger atanǵan. Halyqaralyq sport sheberi.
Jýrnalist Aslan Kajenov erkin kúrestegi bul daýly máseleni federatsiia basshysy Dáýlet Turlyhanov ta biletin de aitty.
"Bas kespek bolsa da, til kespek joq. Quzyrly federatsiia jaǵdaidy tolyq baiandap, túsindirme berýińizdi talap etemin. Odan keiin jastar arasynda álgi kelimsek ne istep júr?! Memleket basshysynyń ózi sońǵy joldaýynda osy máselege erekshe ekpin jasap, arnaiy tapsyrma berdi esep pe?! Onyń sizderge qatysy joq pa?! Álde, oǵan qarsysyzdar ma?! Onsyz da eresekter arasynda eń kóp legionerdi osy kúres túrlerinen tarttyq. Barlyǵy derlik tiisti tólemderi men syiaqylaryn qaltaǵa basyp, keiin óz elderine taiyp turdy. Nege sodan sabaq almaimyz? Endi eresekterdi qoiyp, jastar arasyna kelimsek kirgize bastadyq pa? Kimge kerek bul? Kim naqty jaýapty? Álde, qazaq balalary kúrese almai ma? Joq. Kúresedi. Biraq, mynadai tirlikter olardyń jolyn jabady. Yntasyn tunshyqtyryp, armanyn óltiredi. Osy jaǵdaidan federatsiia basshysy Dáýlet Turlyhanov ta habarlar degendi estidim. Ras pa? Dáýlet myrza, ne deisiz? Ne isteisiz? Qazaqtyń balalary, onyń artynda, jalpy qazaqtyń sporty ábden qor boldy ǵoi...", — deidi jýrnalist.
Eske sala keteiik, Memleket basshysy Qasym-Jomart Toqaev qazaqstan halqyna joldaǵan joldaýynda legionerlerdi shaqyrtýdy toqtatýdy tapsyrdy.
"Kez kelgen legioner ulttyq quramaǵa shaqyrtý alǵysy keletin jas ári bolashaǵynan kóp úmit kúttiretin atletterimizdiń jolyn kesedi. Odan góri qazir bizde damýy kenjelep turǵan sport túrlerinen myqty sheteldik bapkerlerdi tartý múmkindigin qarastyrǵan jón. Legioner-sportshylardyń jetistigi búgin mereiińdi ósirgenmen, erteń abyroiyńdy asqaqtatpaidy. Bul jerde kásibi bapkerge basymdyq bergen jón",– degen edi Memleket basshysy.
Nurdáýlet Seiilbekov pen Mýrat Djakýpov arasyndaǵy máseleni alǵashqylardyń biri bolyp jazǵan Aslan Kajenov búgin ózine aqparattyq qysym kórsetilip jatqanyn aitty.
"Keshe kúreske qatysty máseleni kóterip edim. Maǵan ártúrli paraqshadan aqparattyq shabýyldar bastapty. Onyń artynda kim turǵanyn da jaqsy bilemin. Negizi problemany aitqan adammen emes, problemanyń ózimen alysý qajet. Uzyn-sonar mátinimnen Mýrat Djakýpovty kelimsek degenimdi ustap alyp, soǵan ǵana shúiligip jatyr. Iá, ákesi qazaq eken. Endi bildim. Dese de, bul Mýratqa erekshe basymdyq berip, Nurdáýlet Seiilbekovty dalaǵa laqtyra salýǵa bolady degendi bildirmeidi", — deidi ol.
Aita ketý kerek, ázirge eki sportshyǵa qatysty daýly oqiǵa jóninde federatsiia eshqandai málimdeme jasaǵan joq. Bul legioner máselesin kótergen prezident sózine qarsy shyǵý ma?
