Telefon qońyraýy arqyly aldaityn alaiaqtarǵa jol joq. Qazaqtelekom, Almaty prokýratýrasy jáne Ksell endi frod-qońyraýlarmen birlesip kúresetin bolady. Taiaýda bul týraly taraptar kelisip, tiisti memorandýmǵa qol qoidy.
Aita keteiik, Qazaqtelekom men Ksell operatorlarynyń antifrod-júieleriniń arqasynda qazaqstandyqtardyń uialy telefondaryna halyqaralyq nómirlerdi aýystyra otyryp, 5 000-nan astam alaiaqtyq qońyraý soǵylǵany anyqtaldy. Osy derekterdiń negizinde Almaty prokýratýrasy ruqsat etilmegen trafiktiń kózderin anyqtady. Nátijesinde alaiaqtyq qońyraýlardy uiymdastyrýǵa arnalǵan 4 SIM-box jabdyǵy tabyldy.
«Qazaqtelekom Qazaqstandaǵy iri bailanys operatorlarynyń biri retinde telefon alaiaqtyǵymen belsendi kúres júrgizýde. Kompaniiada arnaiy Qazaqtelekom úshin ázirlengen antifrod júiesi ornatylǵan. Osy jyldyń 11 aiynda antifrod-is-sharalar sheńberinde Qazaqtelekom jelisinde 5 mln-nan astam alaiaqtyq sipattaǵy qońyraýlar buǵattaldy. Frod intsidentterdi pysyqtaý maqsatynda 24/7 tártibinde táýlik boiy jumysty toqtatpaidy. Alaiaqtardyń is-áreketinen zardap shekken abonent týraly aqparat alǵan kezde trafikke taldaý jasalady, antifrod júiesine mundai qylmystyń qaitalanýyn boldyrmaý úshin buǵattaý úshin jańa erejeler dereý qoiylady», - dep atap ótti «Qazaqtelekom» AQ Aqparattyq qaýipsizdik jónindegi basqarýshy direktory Dmitrii Tyrtyshnyi.
IP jáne SIP telefoniiasyn paidalanyp, Qazaqstannan tys jerden shabýyl jasaityn alaiaqtar endi Qazaqstan azamattarynyń qalalyq nómirlerine habarlasa almaidy. Arnaiy júie olardyń qońyraýlaryn tanidy jáne buǵattap tastaidy, bul telefon arqyly alaiaqtyq deńgeiin tómendetip qana qoimai, olardy tolyǵymen toqtatýǵa múmkindik berdi. Byltyr alaiaqtardyń áreketinen 900-den astam azamat zardap shegip, jalpy shyǵyn 1,9 mlrd. teńgeni qurasa, endi júie engizilgen sátten bastap olar elimizdiń birde-bir turǵynyn aldai almady.
«Qazaqtelekom óz jelisindegi qońyraýlardy buǵattap qana qoimai, qońyraýlardyń kózin anyqtaý maqsatynda halyqaralyq operatorlarmen belsendi jumys júrgizýde. Bul Baltyq elderi, Gonkong, Kipr, Ulybritaniiada tirkelgen, biraq qyzmetkerleri men basshylary TMD elderiniń azamattary bolyp tabylatyn shaǵyn tranzittik operatorlar», - dep qorytyndylady Dmitrii Tyrtyshnyi.
Operatorlar alaiaqtyq telefon qońyraýlaryn buǵattai bastaǵandyqtan, endi qylmyskerler WhatsApp jáne Telegram mobildi qosymshalarynyń múmkindikterin paidalana bastady, osy messendjerlerdiń kómegimen olar ańqaý azamattarǵa qońyraý shalýda.
