Kompaniiada memlekettik tildiń qoldaný aiasyn keńeitip, klientterge qazaqsha qyzmet kórsetý, qujat ainalymyn memlekettik tilde júrgizip, qazaq tilinde sóileý mádenietin jaqsartý jumystary qolǵa alynǵan. Onyń ústine 2023 jyl «Qazaqtelekomda» «Servis jyly» bolyp jariialanǵan bolatyn. Sonyń sheńberinde Almaty, Astana qalalarynda «Men qazaqsha sóileimin» atty aýqymdy is-sharalar ótkizildi. Bul is-sharalar qazaq tilinde qyzmet kórsetý sapasyn arttyrý, syrtqy ortamen bailanysta jáne kúndelikti jumysta áriptester arasynda qazaq tilin negizgi kommýnikatsiia quraly retinde dáripteý maqsatyn kózdedi.
«Mundai nátijeli jumystardy júieli túrde ótkizip turǵanymyz jón, kompaniia mundai sharalardan utpasa, utylmaidy. Sondyqtan aldaǵy 2024 jyly da osy formattaǵy is-sharalardy elimizdiń basqa aýmaqtarynda da jalǵastyrýdy josparlap otyrmyz. «Qazaqtelekom» basshylyǵy osyndai igi is-sharalarǵa, bastamalarǵa budan keiin de qoldaý kórsete beretin bolady», - dep atap ótti «Qazaqtelekom» AQ Basqarma Tóraǵasy Qýanyshbek Esekeev.
Qyrkúiek aiynda Almatyda ótken sharalarǵa 80-ge tarta qyzmetkerimiz qatyssa, Astanada jeltoqsanda ótken sharaǵa 60-tan astam kompaniia qyzmetkeri jumyldyryldy.
«Qazirgi ýaqytta halyq tarapynan qazaq tilinde qyzmet alýǵa degen suranys kúnnen kúnge artyp keledi. Bizdiń kompaniianyń halyqpen tikelei jumys jasaityn uiym ekenin eskersek, atalǵan baǵyttaǵy bizge qoiylatyn talaptar, mindetter júgi arta túsetini ózinen ózi túsinikti. Bul jerde memlekettik til saiasatymen qatar, azamattardyń da ana tilimizdiń damýyna degen oń kózqarasy, jeke jaýapkershiligi mańyzdy ról atqarady. Ótkizilip jatqan eki kúndik sharanyń da negizgi maqsattarynyń biri osy», - dep atap ótti qazylar alqasynyń tóraǵasy, «Qazaqtelekom» AQ Basqarma tóraǵasynyń keńesshisi Sailaýhan Raiymbekov.
Sharanyń birinshi kúni kompaniianyń ortalyq apparaty jáne filialdarynan (diviziondar) kelgen klienttermen jáne jalpy syrtqy ortamen jumys isteitin qyzmetkerlerge Dana Rysmambetovanyń basqarýyndaǵy Uiymdastyrý-baqylaý departamenti arnaiy seminar-trening ótkizdi. Seminar-treningtiń sońynda arnaiy tapsyrma alǵan qatysýshylar kóshe, saýda ortalyqtary jáne t.b. kópshilik oryndarda turǵyndar arasynda qai tilde qyzmet alatyndyǵy, qazaqsha qyzmet alýda týyndaityn máseleler, smartfondaǵy túrli qosymshalar men baknomatta tańdaý tili qandai, Qazaqtelekomnyń memlekettik tildegi aqparat sapasy, qyzmet alý tájiribesi jáne pikirlerimen bólisý jóninde saýalnama túrinde suhbat júrgizip, rolik ázirledi.
Sharanyń ekinshi kúni komandalar qyzmet kórsetý, jalpy jumys barysynda týǵan qaqtyǵystyq jaǵdaidy durys sheshýge qatysty kórinis kórsetip, kompaniiada qazaq tilin qalai trendke ainaldyrý týraly óz usynys-pikirlerimen bólisti. Kompaniia qyzmetterine qazaqsha (aýdarma tili emes) jarnamalyq urandar jazdy, sonymen qatar qyzmet kórsetý salasynda qoldanylatyn qazaq tilindegi leksika-frazeologiialyq jáne termindik qordy meńgerýi tekserildi. Baiqaýǵa qazylyq etýge QR Ǵylym jáne joǵary bilim ministrligi Til saiasaty komitetiniń ókilderi men belgili jýrnalister, til janashyrlary shaqyryldy.
QR ǴJBM Til saiasaty komiteti Til saiasatyn iske asyrý basqarmasynyń basshysy Qaiyrjan Raqymjanov is-sharaǵa joǵary baǵa berip: «Suraqtar, berilgen tapsyrmalar da sizderdiń ushqyrlyqtaryńyzdy, kreativtiligińizdi kórsete bildi. Qazaqtelekom ujymymen, sizder siiaqty bilikti mamandarmen tanysqanyma qýanyshtymyn, árqaisyńyz osylaisha memlekettik tildiń damýyna óz úlesterińizdi qostyńyzdar», - dep qatysýshylarǵa alǵysyn bildirdi.
Taǵy bir atap óterlik jáit, kompaniiada til saiasatyna qatysty júrgizip jatqan jumystarǵa qatysty ministrlik ókilderi «Qazaqtelekom» ujymyna Alǵyshat tabys etti.
«Sońǵy jylarda jaqsy úrdis, jaqsy tendentsiiany baiqaimyz. Ol qyzmet kórsetý ortalyqtary, qai jerge habarlassaq ta biz qazaq tilinde sapaly qyzmet ala alatyn boldyq. Óitkeni ózderińiz aityp otyrsyzdar «Qazaqtelekomda» qujat ainalymy 95 paiyzǵa jetipti, bul óte jaqsy kórsetkish. Sol úshin jáne osyndai aýqymdy is-shara uiymdastyrǵanyna kompaniia basshylyǵyna alǵys aitamyn. Árqaisymyz til saqshysy bolyp, damytýymyz kerek», - dep, qazylar alqasynyń múshesi, belgili telejúrgizýshi, aqyn Nazira Berdaly óz pikirimen bólisti.
Shara barysynda áriptesterimiz memlekettik tildi bilý deńgeiin kórsetip qana qoimai, kompaniiada memlekettik tildiń qoldanys aiasyn ári qarai damytýdyń jańa, sony usynys-pikirlerin ortaǵa saldy. Sharany uiymdastyryp, basy-qasynda júrgen «Qazaqtelekom» AQ Uiymdastyrý-baqylaý departamenti osy formattaǵy jumystardy dástúrge ainaldyrmaq. Bul rette seminar-treningterdi ótkizý isine kompaniianyń korporativtik ýniversitetiniń aǵa oqytýshylary da (til mamandary) belsene atsalysqanyn atap ótý kerek.
