Ulttyq agrarlyq ǵylymi-bilim berý ortalyǵynyń basqarma tóraǵasy, Ulttyq qoǵamdyq senim keńesiniń múshesi Tóleýtai Rahymbekov jerdi sheteldikterge satýǵa birjola tyiym salýdy kózdeitin zań jobasyna qatysty pikir bildirdi, dep habarlaidy QazAqparat.
«Aýyl» halyqtyq-demokratiialyq patriottyq partiiasy óziniń sailaýaldy baǵdarlamasynda sheteldik azamattarǵa, azamattyǵy joq azamattarǵa, sondai-aq sheteldik azamattyń kez kelgen qatysy bar zańdy tulǵalaryna jerdi satý men jalǵa berýdi múldem qoldamaitynyn málimdedi. Nelikten? Birinshiden, jer – ata-babalarymyzdan qalǵan amanat. Ekinshiden, qazaqtar eshqashan jerge jeke menshik quqyǵymen ie bolǵan emes. Keibireýler Amerika, Kanada men Eýropany mysalǵa keltirip, jerdi jeke menshikke ótkizýge yntalandyrady. Bul jerde tym bolmaǵanda halyqtyń mentalitetin eskerýimiz kerek», - deidi Ulttyq qoǵamdyq senim keńesiniń múshesi Tóleýtai Rahymbekov.
Onyń aitýynsha, ol memleketterde neni bolsyn ózine menshiktep alý mentaliteti bar, al qazaq halqy úshin jer – ortaq qundylyq.
«Biz jerdi qaýym, rý bolyp paidalandyq. Al qazirgi ýaqytta qazaqstandyqtyń jerdi 49 jylǵa jalǵa alý quqyǵy bar. 20 jasyńda jerdi jalǵa alyp, aýyl sharýashylyǵymen ainalyssań, 69 jasqa deiingi ýaqyt jetkilikti bolar? Eger ol jerde sharýashylyǵyn órbitip, oryndy paidalanyp jatsa, jerdi jalǵa alý ýaqytyn zańdy túrde uzartýdy qarastyrý kerek. Osydan artyq ne kerek? Sondai-aq, jalǵa alǵan jerdiń tiimdi paidalanylǵanyn memleket qatań baqylaýda ustaýy tiis», - deidi ol.
Eske sala ketsek, buǵan deiin Memleket basshysy Qasym-Jomart Toqaev jerdi sheteldikterge satýǵa birjola tyiym salýdy kózdeitin zań jobasyn Májiliske joldaǵany týraly jazǵan bolatynbyz.
