Tanymal mánerlep syrǵanaýshy Denis Tendi eske alý rásimi Tokiodaǵy Qazaqstan elshiliginde de ótip jatyr. Sportshynyń japondyq tabynýshylary óz kýmirimen qoshtasý úshin uzyn-sonar kezekte tur, dep habarlaidy "Ult aqparat".
Elshilik jibergen videojazbalarda gúl ustaǵan halyqtyń kóńil aitý kitabyna jazba qaldyrý úshin kezekte turǵanyn kórýge bolady.
QR Syrtqy ister ministrliginiń baspasóz hatshysy Aibek Smadiiarovtyń habarlaýynsha, tolassyz adamdar legi Elshilikke áli de kelip jatyr jáne olar kóńil aitýǵa arnalǵan segiz kitapty toltyryp úlgerdi.
Eske sala ketsek, Qazaqstandyq mánerlep syrǵanaýshy Denis Ten 19 shilde kúni pyshaq jaraqatynan qaza bolǵan edi. Oqiǵa Qurmanǵazy Baiseiitova kósheleriniń qiylysynda 19 shildede túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy.
