Qazaqstannyń jańa mamandyqtar atlasy kúzde daiyn bolady. Bul týraly Ulttyq qoǵamdyq senim keńesiniń 3-otyrysynda BTSDigital bilim berý jobalarynyń jetekshisi Saiasat Nurbek aitty, dep habarlaidy QazAqparat.
«Orta mektepterde mamandyqqa baǵyt-baǵdarǵa qatysty ortaq kózqarastyń joq ekendigin moiyndaýymyz qajet. Qasym-Jomart Kemeluly, Sizdiń tapsyrmańyzben ázirlenip jatqan jańa mamandyqtar atlasy qyrkúiek aiynda tolyq daiyn bolady. Ony mektepterde mamandyqqa baǵdarlaýǵa alyp, keshendi júiege ainaldyrý qajet», - dedi Saiasat Nurbek.
Sonymen qatar ol kásiptik bilim beretin uiymdarǵa akademiialyq erkindik berý qajettigin basa aitty.
«Qazirgi ýaqytta olar qandai da bir ishki oqý josparyn 50 paiyzǵa deiin rettei alady. Biraq, olarǵa óńirlik erekshelikterdi, naqty kásiporyn qajettiligin eskere otyryp, tolyqqandy akademiialyq erkindik berý qajet. Kásiptik-tehnikalyq bilim beretin uiymdar ózderiniń oqý baǵdarlamalaryn rettei alýlary qajet. Ekinshiden, kolledj stýdentteri bir mamandyq aiasynda birneshe biliktilik ala alýlary jáne eńbek naryǵyndaǵy ózgeriske ushyrap jatqan qajettilikterge barynsha tez beiimdelýi úshin mamandyqty litsenziialaý kerek», - dedi BTSDigital bilim berý jobalarynyń jetekshisi.
Saiasat Nurbek kásiptik bilim berý áleýetin anyqtaýǵa múmkindik beretin WorldSkills baǵdarlamasyn engizý mańyzdylyǵyn aita kele QR Prezidenti Qasym-Jomart Toqaevqa atalǵan qozǵalysty basqarýdy usyndy.
