Almatyda 2021 jylǵy «Joǵary oqý ornynyń úzdik oqytýshysy» ataǵynyń iegerleri marapattaldy, dep habarlaidy QazAqparat tilshisi.
«Joǵary oqý ornynyń úzdik oqytýshysy – 2021» baiqaýy jeńimpazdarynyń esimderi belgili boldy. Respýblikalyq konkýrstyq komissiia óz isiniń úzdikterin tańdady.
Qazaqstandyq 45 JOO-nyń 150 oqytýshysy jeńimpaz atandy. Olardyń árqaisysy 2000 AEK kóleminde syiaqy aldy, bul shamamen 6 mln teńge.
Úzdik pedagogterge marapattardy Ashat Aimaǵambetov tabystady.
«Men barlyq jeńimpazdardy quttyqtaimyn! Bul – úlken mártebe, mańyzdy ataq. Ustazdardyń qoǵamda altyn orny erekshe. «Adamnyń adamshyldyǵy - jaqsy ustazdan»,- dep uly Abai aitqandai, ádiletti qoǵam, myqty memleket bolý úshin jáne Jańa Qazaqstandy qurýda ustazdardyń orny bólek. Memleket basshysy Qasym- Jomart Toqaevtyń tikelei qoldaýynyń arqasynda Bilim jáne ǵylym salasynda úlken oń ózgerister bolyp jatyr. Sonyń ishinde ásirese, pedagogtardyń statýsyn kóterý boiynsha keshendi sharalar iske asyrylyp jatyr», - dedi Ashat Aimaǵambetov.
Konkýrsqa elimizdiń 76 joǵary oqý ornynan barlyǵy 718 úmitker qatysty. Konkýrsta elektrondy oqý resýrstaryn, oqý materialdaryn ázirleý jáne jariialaý, otandyq jáne halyqaralyq jýrnaldardaǵy ǵylymi jariialanymdar, ónertabysqa patentterdiń bolýy jáne t.b. siiaqty kórsetkishter baǵalandy, sondai-aq úmitkerdiń oqytý sapasy, onyń bakalavriatta, magistratýrada jáne doktorantýrada kadrlar daiarlaý qyzmetindegi eńbegi baǵalandy.
Konkýrs jyl saiyn oqytýshylardyń bedelin arttyrý jáne olardy odan ári kásibi damytýǵa yntalandyrý maqsatynda ótkiziledi.
Aita keteiik, konkýrs QR BǴM aqparattyq júiesiniń bazasynda ótti, onyń kómegimen qatysýshylarda barlyq kezeńniń ashyqtyǵyn baqylaýǵa múmkindik boldy. «Joǵary oqý ornynyń úzdik oqytýshysy – 2021» baiqaýyna qatysý úshin ótinimder men qujattar da elektrondyq formatta qabyldandy. Bul konkýrsty ótkizýdiń ashyqtyǵyn qamtamasyz etti.
Sondai-aq komissiia quramynda ÚEU, BAQ, stýdenttik jáne jastar uiymdarynyń, JOO qaýymdastyqtarynyń ókilderi jáne bilim berý salasyndaǵy sarapshylar boldy.
