Ishki ister ministrligi Oral, Aqtóbe jáne Shymkent qalalarynda bopsalaýshylardyń qylmystyq toptaryn ustady, dep habarlaidy "Ult aqparat".
IIM aqparatynsha, sońǵy úsh kúnde úsh qylmystyq toptyń zańsyz áreketi toqtatylǵan. Máselen, Oralda ózderin quqyq qorǵaý organdarynyń qyzmetkerleri retinde tanystyryp, kúsh kórsetý arqyly stýdentten 500 myń teńge bopsalaǵan jergilikti jastar ustaldy. Kúdiktiler qamaýǵa alyndy.
Shymkentte jedel ýákilder qalanyń eki turǵynyn ustap, ýaqytsha ustaý izoliatoryna qamady. Olar jergilikti turǵynnan bir million teńge bopsalap, oǵan qatysty aqparat taratamyz dep qorqytqan.
Sondai-aq Aqtóbede uiymdasqan qylmysqa qarsy kúres bólimshesiniń qyzmetkerleri qylmystyq toptyń múshesin 1 million teńge men Subaru avtokóligin alyp jatqan jerinen qolǵa túsirdi. Kúdikti óziniń úsh sybailasymen birge ǵimarattyń jertólesinde jábirlenýshige moraldyq jáne fizikalyq qysym kórsetip, 8 million teńge bopsalaǵan.
"Sotqa deiingi tergeý júrgizilip jatyr. Bopsalaý faktilerin anyqtaý jáne olardyń aldyn alý jumystary jalǵasady", – dedi IIM uiymdasqan qylmysqa qarsy kúres departamentiniń basqarma bastyǵy Qýandyq Alpys.
