Foto: polisia.kz
Qyzylordalyq politseiler elimizdiń úsh qalasynda internet-alaiaqtar tobyn qolǵa túsirdi, - dep habarlaidy Tengrinews.kz agenttigi Polisia.kz saityna silteme jasap.
Qyzylorda oblysy Politsiia departamentiniń qyzmetkerleri talaidy san soqtyrǵan internet alaiaqtardy quryqtaý boiynsha júrgizilgen arnaiy is-sharany sátti aiaqtap, jeńil jolmen aqsha tabýdy maqsat etken ákki alaiaqtardy qolǵa túsirdi.
Byltyr qarashadan bastap turǵyndarǵa belgisiz bireýler telefon arqyly habarlasyp, "jaqynyń esirtki zatymen ustalyp tur, ony jazadan bosatý úshin biz aitqan esepshotqa dereý qarajat aýdarýyńyz kerek" dep qorqytyp, alaiaqtyq jolmen qarajattaryn jymqyryp kelgen qylmyskerler paida bolǵan. Osy kúnge deiin uqsas derekter boiynsha oblys aýmaǵynda 32 qylmystyq is tirkelip, jábirlenýshilerge keltirilgen shyǵyn kólemi 24 million teńgege jýyqtady.
Ákki alaiaqtardyń qylmystyq is-áreketterin áshkereleý maqsatynda Politsiia departamentiniń bilikti qyzmetkerleri qatarynan jedel-tergeý toby qurylyp, tergeý amaldary bastaldy. Tergeý nátijesi jinaqtalǵan aiǵaqtarmen alaiaqtyq tásilderdiń dálme-dál uqsastyǵyn jáne bul qylmystardyń barlyǵy belgili bir qylmystyq toppen jasalǵandyǵyn kórsetti.
Jedel-tergeý toby alaiaqtardyń is-áreketterin dáleldeitin aiǵaqtardyń jetkilikti deńgeide jinalǵandyǵyn nazarǵa alyp, 15 shilde elimizdiń úsh oblysynda, iaǵni Almaty, Aqtóbe jáne Jambyl oblystarynda arnaiy is-shara ótkizdi.
Is-shara barysynda ár oblysta bir-birimen sybailasý arqyly alaiaqtyqpen ainalysyp kelgen 8 adamnan quralǵan qylmystyq top quryqtaldy. Alaiaqtardyń mekenjaiyn tintý barysynda qylmys quraly retinde qoldanylǵan 17 uialy telefon, beitanys tulǵalardyń atyna jasyryn tirkelgen 15 abonenttik nómirler, 60 azamattyń JSN, aty-jóni jazylǵan tizim, aqsha ainalymdaryn tirkegen bloknot anyqtalyp, aiǵaq zat retinde tárkilendi.
