Qazaqstan Respýblikasynyń Ýkrainadaǵy Elshisi Darhan Káletaev ekinshi dúniejúzi soǵysynyń ardageri Nurbai Amanjolovty Jeńistiń 75 jyldyǵymen quttyqtady, dep habarlaidy "Ult aqparat" QR SIM baspasóz qyzmetine silteme jasap.
Qazaqstandyq diplomat 97 jastaǵy soǵys ardagerine Qazaqstan Respýblikasynyń Prezidenti Qasym-Jomart Toqaevtyń Alǵys haty men «Barys» tós belgisin tabystap, oǵan rýhtyń sergektigin saqtaýdy, densaýlyq pen uzaq ómir tiledi.
Júzdesý barysynda N.Amanjolov óziniń áskeri erlikteri týraly estelikterimen jáne beibitshilik ómirdegi qyzyqty oqiǵalarymen bólisti. Shyǵys Qazaqstan oblysyndaǵy Katonqaraǵai aýdanynan maidanǵa 18 jastaǵy bozbala bolyp attanyp, Ýkraina men Polshany azat etýge, Sandomir platsdarmyn buzýǵa, Oder ózeninen ótýge, Pragany bosatýǵa qatysqan. Soǵystan keiin Karpat janyndaǵy áskeri okrýgte qyzmet etip, polkovnik ataǵymen zeinetkerlikke shyqty. I dárejeli «Otan soǵysynyń qyzyl juldyzy» jáne I dárejeli «Bogdan Hmelnitskii» ordenderimen, sondai-aq 26 medalmen marapattalǵan.
Ardager óziniń sanaly ómirin Ýkrainada ótkizgenine qaramastan, óziniń Otany - Qazaqstan Respýblikasymen tyǵyz bailanysyn saqtap qalǵanyn jáne Uly Otan soǵysynyń ardagerleri men tyl eńbekkerlerine degen memleket basshylyǵynyń qamqorlyǵyn joǵary baǵalaitynyn atap ótti.
.jpeg)