«Qazaqstannyń tumsa tabiǵaty» atty fotobaiqaý ótkiziledi, dep habarlaidy "Ult aqparat" Ekologiia, geologiia jáne tabiǵi resýrstar ministrliginiń baspasóz qyzmetine silteme jasap.
Ministrlik «National Geographic Qazaqstan» jýrnalynyń redaktsiiasymen birlesip «Qazaqstannyń tumsa tabiǵaty - 2021» atty alǵashqy respýblikalyq fotobaiqaý ótkizedi. Júlde qory 1,5 mln teńge.
Saraptaý komissiiasynyń quramyna kásibi sheteldik jáne otandyq fotograftar, fotosýret salasyndaǵy sarapshylar, BAQ ókilderi kiredi. Baiqaýǵa áýesqoi fotograftar men 18 jastan asqan kásibi mamandar qatysa alady.
Qatysýshylar jumysy 1 aqpannan 15 sáýirge deiin qabyldanady. Baiqaý sharttarymen myna siltemede tolyq tanysýǵa bolady.
Uiymdastyrýshylar adam men tabiǵattyń ózara qatynas máselesine, tabiǵi ártúrlilikti saqtaýǵa qoǵam nazar aýdarý, qorshaǵan ortany qurmetteý ideiasyn keńinen nasihattaýdy kózdeidi.
Buǵan deiin Qazaqstan Prezidenti Qasym-Jomart Toqaev ekologiialyq bilim berýdiń, mektep qabyrǵasynan bastap halyqty aǵartýdyń mańyzdylyǵyn atap ótken bolatyn. Osyǵan bailanysty, Ekologiia ministrligi qorshaǵan ortany qurmetteý, janýarlarǵa jaýapkershilikpen qaraý salalaryndaǵy jaǵdaidy jaqsartý, sondai-aq ulttyq parkterde ekotýrizmdi damytý úshin qujattar paketin daiyndaýda.
Osy máselelerdi sheshý úshin ministrlik tiisti bas josparlardy ázirledi, olardy halyqpen talqylaý boiynsha jumystar júrgizilýde. Sonymen qatar, qabyldanatyn sheshimderdiń ashyqtyǵyn qamtamasyz etý maqsatynda ulttyq parkter janynan qoǵamdyq keńester quryldy.
