Qazaqstannyń syrtqy qaryzy shamamen 168 mlrd AQSh dollaryn quraidy. Bul týraly búgin Ortalyq kommýnikatsiialar qyzmetindegi brifingte QR Ulttyq banki tóraǵasy Daniiar Aqyshev aitty, dep habarlaidy "Ult aqparat" QazAqparat agenttigine silteme jasap.
«Syrtqy boryshqa qatysty derekter esepti kezeń aiaqtalǵannan keiin 90 kúnnen keiin ǵana jariialanady. Sondyqtan bizdiń málimetter 2017 jyldyń 1 shildesine deiin ǵana jariia etilgen. Syrtqy qaryz shamamen 168 mlrd AQSh dollaryn quraidy», - dedi Daniiar Aqyshev BAQ ókilderiniń saýalyna orai.
Ulttyq banktiń baspasóz qyzmeti taratqan málimetke sáikes, atalǵan qaryzdyń 7,9 paiyzy nemese 13,2 mlrd AQSh dollary - bul memlekettik sektordyń syrtqy boryshy; 3,7 paiyzy nemese 6,2 mlrd. AQSh dollary - «Bankter» sektorynyń syrtqy boryshy; 25,2 paiyzy nemese 42,4 mlrd. AQSh dollary - «Basqa sektorlardyń» tikelei investitsiialarǵa bailanysty emes bereshegi. Qalǵan 63,2 paiyzy nemese 106,1 mlrd. AQSh dollary osy sektordyń firmaaralyq bereshegin quraidy.
«2017 jylǵy birinshi jartyjyldyqta eldiń syrtqy boryshynyń kólemi 4,2 mlrd. AQSh dollaryna, onyń ishinde 2017 jylǵy ekinshi toqsanda 2,4 mlrd. AQSh dollaryna ulǵaidy. Memlekettik sektordyń syrtqy boryshy, negizinen halyqaralyq kapital naryǵynda shyǵarylǵan táýelsiz eýroobligatsiialar qunynyń ósýi jáne beirezidentter tarapynan Ulttyq banktiń qysqa merzimdi nottaryna degen suranystyń artýy esebinen 0,4 mlrd AQSh dollaryna ósti», - delingen taratylǵan aqparatta.
Sonymen qatar Ulttyq bank málimetinshe, «Bankterdiń» syrtqy mindettemeleri eýroobligatsiialardy jáne qoldanystaǵy syrtqy qaryzdardy josparly óteý nátijesinde 1 mlrd AQSh dollaryna qysqardy. «Basqa sektorlardyń» úlestes emes beirezidentter aldyndaǵy syrtqy boryshy, negizinen 2017 jylǵy ekinshi toqsanda «QazMunaiGaz» UK» AQ-nyń orta merzimdi aýqymdy nottardy shyǵarý baǵdarlamasy aiasynda eýroobligatsiialardyń 5, 10, jáne 30 jyldyq shyǵarylymdaryn ornalastyrýy esebinen 3,0 mlrd. AQSh dollaryna ulǵaidy. Firmaralyq bereshek, negizinen munai-gaz jobalaryn budan ári qarjylandyrý jáne tikelei investorlar aldyndaǵy tólenbegen dividendter jáne qaryzdar boiynsha syiaqy boiynsha bereshektiń ósýi esebinen 1,8 mlrd AQSh dollaryna ósti.
2017 jylǵy birinshi jartyjyldyqta Qazaqstannyń taza syrtqy boryshy 3,1 mlrd AQSh dollaryna artyp, 41,2 mlrd AQSh dollaryna deiin ulǵaidy.
