Qazaqstan Respýblikasynyń syrtqy boryshy 2017 jylǵy 1 qazandaǵy jaǵdai boiynsha, sońǵy 10 jylda 74,6 mlrd. AQSh dollaryna ulǵaiyp, 168,9 mlrd dollardy qurady, dep habarlaidy "Ult aqparat" QR Ulttyq bankiniń baspasóz qyzmetine silteme jasap.
«Syrtqy boryshtyń ósýi, negizinen, el aýmaǵyndaǵy sheteldik kompaniialar filialdarynyń munai-gaz jobalary aiasyndaǵy 76,7 mlrd. AQSh dollary mólsherindegi firmaaralyq bereshektiń ulǵaiýy esebinen boldy. Sonymen qatar eýroobligatsiialar shyǵarý jáne kreditter men qaryzdardy tartýǵa bailanysty ekonomikanyń qarjylyq emes sektorynyń 26,2 mlrd AQSh dollaryna jáne Úkimettiń syrtqy boryshynyń 10,8 mlrd AQSh dollaryna ulǵaiýy baiqaldy», - delingen habarlamada.
Ulttyq Banktiń syrtqy mindettemeleri eldiń syrtqy boryshy kóleminiń ortasha alǵanda 0,6%-yn qurai otyryp, is júzinde ózgergen joq.
Qarjy sektorynyń syrtqy bereshegi, negizinen, bank sektorynyń («Qazaqstannyń Damý Banki» AQ-ty qosa alǵanda) kreditter jáne qaryzdar boiynsha beresheginiń 37,4 mlrd AQSh dollaryna azaiýy esebinen 39,1 mlrd AQSh dollaryna qysqardy. Bul qysqarý eń tómengi rezervtik talaptar tetiginiń, prýdentsiialyq normativterdiń qoldanylýynyń, jetkilikti kapitaldandyrý qaǵidalarynyń arqasynda da boldy.
Syrtqy boryshtyń IJÓ-ge qatynasy 3,5%-ǵa jaqsaryp, 108,9% boldy. Sonyń 62%-y firmaaralyq bereshekke, 26%-y «Basqa sektorlarmen» bailanysty emes kreditorlar aldyndaǵy syrtqy boryshyna, 8%-y memlekettik syrtqy boryshqa (Úkimet pen Ulttyq Bank), 4%-y «Bankter» sektorynyń (EDB jáne «Qazaqstannyń Damý banki» AQ) syrtqy mindettemelerine tiesili.
2017 jylǵy 3-toqsanda eldiń syrtqy boryshy, «KazTransGaz» AQ-tyń eýroobligatsiialardyń 10 jyldyq shyǵarylymyn 750 mln. AQSh dollaryna teń jalpy nominaldyq kólemmen ornalastyrý, rezidentterdiń kommertsiialyq kreditter boiynsha bereshegin 204,8 mln AQSh dollaryna ulǵaitý, eýroobligatsiialardyń qoldanystaǵy shyǵarylymdary boiynsha kýpondyq syiaqy esepteý (185,7 mln AQSh dollary) esebinen 1 mlrd AQSh dollaryna ósti.
Aita keteiik, memleket baqylaityn uiymdardyń syrtqy boryshy 2017 jylǵy 1 qazandaǵy jaǵdai boiynsha 26,4 mlrd AQSh dollaryn quraǵan.
