Qazaqstan Respýblikasy Premer-Ministriniń orynbasary – Syrtqy ister ministri Muhtar Tileýberdi Qyrǵyz Respýblikasynyń Syrtqy ister ministri Rýslan Kazakbaevtyń shaqyrýymen Bishkek qalasyna resmi saparmen bardy, dep habarlaidy QR SIM baspasóz qyzmeti.
Sapardyń birinshi kúni M.Tileýberdi óziniń qyrǵyz áriptesi R.Kazakbaevpen kelissózder júrgizdi. Taraptar ekijaqty yntymaqtastyqtyń ózekti máseleleriniń keń aýqymy, óńirlik jáne halyqaralyq kún tártibi boiynsha «saǵattardy teńestirdi», sondai-aq joǵary jáne asa joǵary deńgeilerde qol jetkizilgen ýaǵdalastyqtardy jedel iske asyrý boiynsha naqty sharalardy belgiledi.
Ministrler ekijaqty taýar ainalymyn arttyrý, ónerkásiptik kooperatsiiany damytý jáne mádeni-gýmanitarlyq bailanystardy nyǵaitý joldaryn talqylady. Investitsiialardy qorǵaý jáne sý-energetika salasyndaǵy yntymaqtastyq máselelerine erekshe nazar aýdaryldy.
M.Tileýberdi Qazaqstan eki jaqty negizgi qujattarda - Máńgilik dostyq týraly shart jáne Odaqtastyq qatynastar týraly shartta belgilengen Qyrǵyzstanmen táýelsiz damý jyldarynda qalyptasqan tatý kórshilik jáne odaqtastyq qatynastardy joǵary baǵalaitynyn atap ótti. «Elimizdiń joǵary basshylyǵy árqashan sizdiń respýblikańyzben tyǵyz jaqyndasý baǵytyn ustanady. Biz baýyrlas Qyrǵyzstanda árdaiym beibitshilik pen turaqtylyqtyń bolýyna shyn júrekten múddelimiz», - dedi Qazaqstan SIM basshysy.
Óz kezeginde Qyrǵyzstan SIM basshysy R.Kazakbaev qazaqstandyq tarapqa turaqty qoldaý kórsetkeni úshin alǵysyn bildirdi, atap aitqanda, pandemiianyń kúrdeli jaǵdaiynda Qazaqstannyń kórsetken gýmanitarlyq kómegin erekshe atap ótti.
«Qazaqstan biz úshin baýyrlas respýblika, máńgilik dos, senimdi odaqtas jáne strategiialyq seriktes. Qazaqstannyń Tuńǵysh Prezidenti - Elbasy Nursultan Nazarbaevtyń ózara tiimdi yntymaqtastyqtyń senimdi jáne shyn máninde baýyrlastyq qatynastaryn qurýdaǵy baǵa jetpes rólin atap ótkim keledi. Qazaqstan Prezidenti Qasym-Jomart Toqaev elimizben ózara is-qimyldy nyǵaitýǵa baǵyttalǵan saiasi baǵyttyń sabaqtastyǵyn jalǵastyrýda», - dedi R.Kazakbaev. Qyrǵyzstan burynǵydai baýyrlas Qazaqstanmen ekijaqty jáne kópjaqty qatynastardy tereńdetýge baǵyttalǵan syrtqy saiasatty júrgizetin bolady, dep qosty ol.
Qazirgi ýaqytta strategiialyq perspektivada yntymaqtastyqty odan ári nyǵaitý úshin Qazaqstan men Qyrǵyzstan arasynda tiisti tetikter qurylyp, jumys isteýde – Joǵary Memleketaralyq keńes, Úkimetaralyq keńes, Syrtqy ister ministrleri keńesi, sondai-aq Yntymaqtastyq jónindegi parlamentaralyq keńes.
Qazaqstan Qyrǵyzstan ekonomikasynyń iri investorlarynyń qataryna kiredi jáne 2005 jyldan bastap 2020 jylǵa deiin jinaqtalǵan tikelei investitsiialar kólemi 1 mlrd. AQSh dollar qurady. Óz kezeginde, bizdiń elimiz Qyrǵyzstannyń syrtqy saýda ainalymynda 3-shi oryn alady.
Joǵary deńgeidegi ýaǵdalastyqtarǵa sáikes toǵyspaly túrde mádeniet kúnderin uiymdastyrý, Bishkekte Abai jáne Nur-Sultanda Manas eskertkishterin ashý jáne birlesken bilim berý baǵdarlamalaryn ázirleý pysyqtalýda. Qazaqstan qyrǵyz jastaryn elimizdiń joǵary oqý oryndarynda oqytý úshin jyl saiynǵy kvotalardy ulǵaitýdy josparlaýda. Sondai-aq, Bishkekte qazaqstandyq aldyńǵy qatarǵy joǵary oqý oryndarynyń biriniń filialdaryn ashý múmkindigi zerttelýde.
Ministr M.Tileýberdi Qyrǵyzstannyń Jogorký Kenesh tóraǵasy Talant Mamytovpen kezdesip, parlamentaralyq yntymaqtastyqty damytý máselelerin talqylady. Taraptar eki el arasyndaǵy kópjosparly ózara is-qimyldy arttyrýǵa ortaq múddelilik tanytty.
Sapar aiasynda qazaqstandyq delegatsiia «Ata-Beiit» memorialdyq keshenine gúl shoqtaryn qoiý rásimine qatysty.
