Qazaqstannyń Reseidegi Elshiliginiń keńesshi-elshisi qyzmetine buryn Qazaqstannyń Qazandaǵy bas konsýly laýazymyn atqarǵan Erkin Tuqymov taǵaiyndaldy, dep habarlaidy "Ult aqparat" Erkin Tuqymovtyń Feisbýktegi paraqshasyna silteme jasap.
«Kezdeskenshe, Qazan» dep aitatyn kez keldi. Kelesi aptadan Qazaqstannyń Reseidegi Elshiliginde keńesshi-elshi retinde qyzmetke kirisemin.
Qazandaǵy bas konsýl bolyp jumys istegen bir jyl eki ai jemisti boldy. Prezidenttiń sapary, úkimetaralyq komisiialar, kóptegen mádeni, bilim berý sharalary. Osy ýaqyt ishinde Qazaqstan men Tatarstan bir-birine jaqyndai tústi dep oilaimyn!
Bul ýaqyt aralyǵynda qyzmet babymen myńdaǵan shaqyrym jol júrdim, Reseidiń aýqymdy ári alýan túrli ekendigin, qanshama tól mádeniet, halyq turatynyn kórdim: bashqurttar, mariiler, chývashtar, ýdmýrttar. Bizdi bailanystyryp turǵan jaittar qanshama. Men jyldan astam ýaqytta búkil Reseiden talai adammen dostastym. Qazanda da, Ýfada da, Cheboksaryda da úiimdegidei qarsy alatynyn bilip, emin-erkin kele alamyn. Men barǵan jerdiń bárinde Qazaqstanǵa zor qurmet ári dostasý nietin kórdim! Bul óte tamasha, men osy jańa sezimder men dostyq úshin barshaǵa alǵys bildiremin.
Tatarstan Prezidenti Rýstam Minnihanovqa kirip, Bas konsýldyqtaǵy jumys barysyndaǵy kómegine rahmet aitpai kete almadym! Tipti, Rýstam Nurǵalievichten Imanǵali Nurǵaliulyna bara jatyrmyn dep kúlisip te aldyq», - dep jazdy Erkin Tuqymov.
Erkin Valithanuly Tuqymov 1973 jyly Ózbekstanda, Termiz qalasynda týǵan.
1997 jyly Varshava halyqaralyq qatynastar institýtyn úzdik bitirip, 2004 jyly QR Ǵylym akademiiasynyń Filosofiia jáne saiasattaný institýtynyń aspirantýrasyn tamamdady.
Eńbek jolyn 1997 jyly QR Prezidenti janyndaǵy Qazaqstan strategiialyq zertteýler institýty syrtqy saiasi zertteýler bóliminiń aǵa ǵylymi qyzmetkeri retinde bastady.
2000-2005 jyldary QSZI syrtqy saiasat bóliminiń meńgerýshisi.
2005-2007 jyldary Ortalyq Aziia demokratiiany damytý qorynyń bas direktory boldy.
2007-2008 jyldary QR Prezidenti ákimshiliginde aqparattyq-taldaý ortalyǵynyń strategiialyq taldaý sektorynyń meńgerýshisi, Strategiialyq ázirlemeler jáne taldaý ortalyǵynyń strategiialyq halyqaralyq yqpaldastyq sektorynyń meńgerýshisi qyzmetterin atqardy.
2008 jyldyń maýsymynda QR Syrtqy ister ministrligi Ortalyq Aziia departamenti direktorynyń orynbasary, keiinnen departament direktory boldy.
2010 jylǵy qańtar aiynda Qazaqstan Respýblikasy Qaýipsizdik Keńesi Taldaý bóliminiń meńgerýshisi boldy.
Qazaqstannyń Qazandaǵy bas konsýly laýazymyna 2018 jyly taǵaiyndaldy.
Diplomatiialyq dárejesi - Qazaqstan Respýblikasy Syrtqy ister ministrliginiń II synypty keńesshisi.
«Eren eńbegi úshin», «Qazaqstan Respýblikasynyń táýelsizdigine 20 jyl» medaldarymen marapattalǵan.
