Qazaqstannyń ońtústiginde el halqynyń 38 paiyzy turady. Olar - Qyzylorda, Ońtústik Qazaqstan, Jambyl jáne Almaty oblystary. Al, shamamen 17 paiyz halyq soltústik óńirlerde turyp jatyr. Bul týraly búgin Senatta ótken jiynda Eńbek jáne halyqty áleýmettik qorǵaý ministri Tamara Dúisenova málimdedi, - dep habarlaidy "Ult aqparat" "Egemen Qazaqstan"-ǵa silteme jasap.
«Egerde mundai jaǵdai odan ary saqtala beretin bolsa, onda boljamǵa sáikes 2050 jylǵa qarai ońtústik óńirlerdiń halqy 5,2 mln. adamǵa jetedi. Soltústik óńirlerdiń halqynan 4 esege asyp túsedi, al soltústik óńirlerdiń turǵyndary 1 mln. adamǵa kemidi», — dedi ministr. Onyń aitýynsha, qazirdiń ózinde halyqtyń qonystanýda teńgerimsizdik baiqalady.
Ministr ońtústik óńirde 100 jańa týǵan balaǵa 12 qart adamnan kelse, soltústik óńirde 100 jańa týǵan balaǵa 53 qart adamnan keletinin aitty. Onyń aitýynsha, «Jumyspen qamtý jol kartasy» júiege asyrylǵan jyldardyń ishinde ońtústik óńirlerden Soltústik Qazaqstan, Qostanai jáne Pavlodar oblystaryna 19 myń adam kóship barǵan. Olarǵa baǵdarlama aiasynda 5,4 myń qyzmettik páterler men jataqhanalarda bólmeler salynǵan.
«Bul saiasat odan ary da jalǵasa beredi. Degenmen, endigi ýaqytta jumyspen qamtýdyń jańa baǵdarlamasy aiasynda baspana salý qarastyrylmaidy. Óitkeni, «Nurly jol» baǵdarlamasy júzege asyrylýda. Biraq, jumyspen qamtýdyń jańa baǵdarlamasy aiasynda qonys aýdarýshylardyń jalǵa alatyn baspanalaryna tólem jasaý múmkinshiligi qarastyrylady. Otbasy músheleriniń sanyna bailanysty árbir múshege 34 myńnan 68 myń teńgege deiin baspana jaldaýǵa sýbsidiia beriledi. Máselen, bir adam kelse, onda oǵan qalalyq jerde baspana jaldaýǵa 20 AEK beriledi. Bul shamamen 45 380 teńge. Eger otbasynda 2-den 4 adamǵa deiin bolsa,onda 25 AEK beriledi. Munan bólek, jergilikti biýdjet esebinen turǵyn úi salý múmkinshiligi de qarastyrylýda», — dedi ol.
