Foto: olympic.kz
Parijde ótetin XXXIII jazǵy Olimpiada oiyndarynyń bastalýyna sanaýly ailar qaldy. Qazir Qazaqstan quramasynyń qorjynynda 50 olimpiada joldamasy bar. Aldaǵy litsenziialyq týrnirlerde joldama sany taǵy da tolyǵýy múmkin. Sport sarapshylary olimpiada joldamasynyń burynǵy kórsetkishterge qaraǵanda azaiǵanyn eldegi sport deńgeiiniń tómendep bara jatqanymen bailanystarady.
Jazǵy Olimpiada oiyndary XIX ǵasyrdyń sońynan bastaý alady. Tórt jylda bir keletin dúbirli doda álemdegi eń úlken sport básekesiniń biri sanalady. Bul bairaqty básekege Qazaqstan quramasy jeke komanda retinde 1996 jyldan bastap qatysady. Pandemiiaǵa bailanysty bir jylǵa keshigip, 2021 jyly Tokioda ótken olimpiada oiyndarynda Qazaqstan 8 qola medal iemdenip, jalpy esepte 83-oryn aldy.
Al buǵan deiingi Olimpiada oiyndarynda qazaqstandyq sportshylar birneshe altynǵa ie bolyp, joǵary dárejede óner kórsetken. Máselen, táýelsizdik alǵannan keiingi alǵashqy Olimiada oiyndarynda (1996) qazaqstandyq sportshylar 3 altyn, 4 kúmis, 4 qola medalmen jalpy esepten 24-oryn alǵan edi. Odan keiin Sidneide 22 orynnan (3 altyn, 4 kúmis) kórinse, 2004 jyly Afinyda 1 altyn, 4 kúmis 3 qola júldemen 40-orynǵa bir-aq syrǵydy.
Doping daýyna bailanysty 2012 jyly London olimpiadasynda alǵan 7 altynnyń tórteýi (Ilia Ilin, Zúlfiia Chinshanlo, Maiia Maneza, Svetlana Podobedova) keiin qaitaryldy. Rio-de-Janeirodaǵy básekede de ziltemirshi Nijat Rahimov doping daýyna iligip, Olimpiada altynynan aiyryldy. Al biyl qazaqstandyq aýyr atletter óz tarihynda alǵash ret Olimpiada oiyndaryna qatysý múmkindiginen tys qaldy.
Búginde Qazaqstanda Olimpiada oiyndarynyń litsenziiasy 50-ge jetti. Sarapshylardyń aitýynsha, bul kórsetkish óte az, biraq alda taǵy birneshe litsenziialyq týrnir ótetin bolatyndyqtan, joldama sany ózgerýi múmkin.
Sport jýrnalisi Aslan Qajenov Qazaqstandaǵy sporttyń deńgeii jyl ótken saiyn tómendep bara jatqanyn aitady. Onyń sózinshe, kóptegen sportta dinamika tómen túsken, qarqyndy damý baiqalmaidy.
"Joldamanyń sany 40-tan asty. Bul árine tómen kórsetkish. Jalpy ministrlik aldyna Olimpiadaǵa deiin litsenziialar sanyn 70-ten asyramyz degen jospar bar. Árine bul az, buǵan deiin joldama sany kemi 100 bolatyn edi. Biraq quzyrly ministrlik, sportqa jaýapty mamandar, bári de san emes sapa degen uǵymdy alǵa tartyp otyr", – deidi ol.
Týrizm jáne sport ministri Ermek Marjyqpaev 16 naýryzda irikteý saiystary aiaqtalǵansha 20-25 sport túrinen 80 joldama alýdy maqsat etip otyrǵanyn aitqan. Ministr Olimpiadada ásirese boksshylardan kóp úmit kútetinin jasyrmady.
Buǵan deiin burynǵy QR Týrizm jáne sport ministri Ashat Oralov Tokio Olimpiadasy tájiribesi zerdelengenin jáne ótken jyly sportty qoldaýǵa 50 milliard teńgeden astam qarjy bólingendigin aitqan.
"Qazirdiń ózinde dál osy dep naqty kesip aitý qiyn. Biraq bilýimshe, Boks federatsiiasy 1 altyn, 1 kúmis, 1 qola degen mindetteme aldy. Jáne boksshylarymyz 1 altyn alyp keledi degen oidamyn. Meniń oiymsha, ony ne Nurbek Oralbai ne Sáken Bibosynov alýy múmkin. Odan keiin, tenniste Rybakinaǵa, Keniiadan kelgen qyz Nora Djerýtoǵa altyn alady dep úmit artylyp otyr", – dep qosty Qajenov.
Qazaqstan Boks federatsiiasy osy jyldyń 1 sáýirinde joǵarǵy nátije kórsetken boksshylarǵa syiaqy bólinetinin habarlady. Resmi aqparatqa sensek, 1-oryn úshin federatsiia tarapynan 220 000$, 2-orynǵa 120 000$, 3-oryn úshin 70 000$, 4-orynǵa 30 000$ jáne 5-oryn úshin 10 000$ bólinedi.
Búginde Parijge Qazaqstan atynan 7 boksshy joldama alǵany belgili bolyp otyr.
Sport jýrnalisi Vsevolod Hvan biyl Parijge shamamen 80-90 qazaqstandyq sportshy barýy múmkin deidi.
"Eger sportshylar 9-10 medal alsa, bul óte jaqsy nátije bolmaq. Ishinde 1-2 altyn alsaq, bul tipti keremet. Boksshy Aslan Shymbergenov, dziýdoshy Ábiba Ábýjarqyn, palýan Álisher Erǵali Olimpiada chempiony bolýy múmkin. Oq atý, nysanaǵa kózdeýde de jaqsy múmkindikter bar, sebebi mergenderimiz myqty", – dedi Hvan.
QR Týrizm jáne sport ministrligi byltyr 12 sáýirde, resmi Instagram paraqshasynda halyqaralyq sporttyq jarystardyń chempiondary men júldegerlerine, oǵan qosa, jattyqtyrýshylar men komanda múshelerine bólinetin qarajat kólemin jariialady.
Resmi aqparatta Jazǵy Olimpiada chempiondaryna 250 000$ kóleminde aqshalai syiaqy bólinetindigi aitylǵan. Al Olimpiadanyń kúmis júldegerlerine 150 000$, qola iegerlerine 75 000$ túrinde syiaqy berilmek.
Avtor: Anel Muhat
