Qazaqstannyń Norvegiiadaǵy Elshisi Erkin Ahinjanov norvegiialyq Svalbard provintsiiasynyń (Shpitsbergen arhipelagy) ákimshilik ortalyǵy – Longiir qalasyna is-saparmen bardy, dep habarlaidy "Ult aqparat".
Svalbard halyqaralyq ǵylymi-zertteý qaýymdastyǵy úshin erekshe maǵynaǵa ie. Soltústik poliýske jaqyn ornalasqandyǵyna jáne biregei klimattyq jaǵdaiǵa bailanysty bul jerde birneshe eldiń ǵylymi stansalary jáne telekommýnikatsiia, meteorologiia, seismologiia, ǵaryshtyq zertteýler men t.b. salalaryndaǵy birqatar mańyzdy joǵary tehnologiialyq obektiler jumys jasaidy.
«Biyl Qazaqstan Táýelsizdiginiń 30-jyldyǵyn atap ótedi. Búgingi tańda bizdiń el postkeńestik keńistiktegi ekinshi, al Ortalyq Aziiadaǵy eń iri ekonomika. Prezident Qasym-Jomart Toqaevtyń basshylyǵymen qoǵamdyq-saiasi men ekonomikalyq salalarda keshendi reformalar júzege asyrylýda. Sonymen qatar, elimiz halyqaralyq áriptestikdiń jańa múmkindikterin belsendi túrde zertteýde. Biz Svalbardtyń jetekshi kompaniialarymen investitsiialyq jáne ǵylymi-tehnikalyq yntymaqtastyqty talqylaý úshin keldik», - dedi E.Ahinjanov Svalbard gýbernatorynyń mindetin atqarýshy Sólvi Elvedalmen ótken kezdesý barysynda.
Sapar aiasynda Svalbardtaǵy Dúniejúzilik tuqym qoimasynyń úilestirýshisi Osmýnd Asdalmen, sondai-aq jerdegi «SvalSat» jerserik stansasynyń direktory Maiia-Stina Ekstedtpen mazmundy kezdesý ótti. Ǵylym, tehnologiia jáne bilim salalaryndaǵy ózara is-qimyl máseleleri Svalbardtaǵy Ýniversitet ortalyǵy men Norveg poliarlyq institýtynda talqylandy.
Osymen birge qazaqstandyq delegatsiia tarihi men mádeni turǵydan maǵynaly, mańyzdy iri derekter, ziiatkerlik menshik jáne t.b. aqparaty bar tsifrlyq derekterdi saqtaityn Dúniejúzilik Arktika muraǵatyna (AWA) bardy. Málimetter 500 jyldan astam qyzmet ete alatyn qurylǵylarda saqtalady, olar máńgi tońda tereńdegi bolat qoimaǵa ornalastyrylǵan.
Qazaqstannyń Ulttyq rámizderi kúni qarsańynda Memlekettik tý, Eltańba, Ánuran, Konstitýtsiia jáne 1991 jylǵy 16 jeltoqsandaǵy «Qazaqstan Respýblikasynyń Memlekettik táýelsizdigi týraly» zańy bar aqparattyq faildar atalǵan muraǵatqa ornalastyryldy. Faildar Dúniejúzilik Arktika muraǵatyn basqaratyn «Piql» kompaniiasynyń arnaiy tehnologiiasymen aldyn ala arhivatsiialanǵan bolatyn.
