1 shildedegi málimet boiynsha, Qazaqstannyń memlekettik qaryzy 14,2 trillion teńgeni quraǵan. Bul týraly búgin qarjy vitse-ministri Rýslan Beketaev málimdedi, dep habarlaidy Sputnik Qazaqstan tilshisi.
Búgin Senatta memlekettik jáne memleket kepildendirgen qaryz alý men boryshy, kvazimemlekettik sektor boryshy máseleleri boiynsha jiyn ótti. Shara barysynda qarjy vitse-ministri Qazaqstanyń boryshyna toqtaldy. Beketaev sońǵy jyldary Qazaqstan ekonomikasynda ósim qarqynynyń báseńdegeni baiqalyp otyrǵanyn atap ótti.
"Alaida qarjy ministrligi qazirgi tańda memlekettik qaryz deńgeii qolaily deńgeide ekenin aita alady. Is júzinde qaryz indikatorlarynyń deńgeii uiǵarymdy shekte jáne úkimettiń ekonomikalyq blogynyń qorqynyshyn týǵyzyp otyrǵan joq", — dedi vitse-ministr.
Onyń aitýynsha, memlekettik qaryz jyl basynan beri 704 milliard teńgege ulǵaiǵan.
"2018 jyldyń 1 shildesindegi jaǵdai boiynsha, memlekettik borysh 14,2 trillion teńgeni nemese JIÓ-niń 24,8 protsentin qurady. Jyl basynan beri absoliýttik mánde 704 milliard teńgege ulǵaidy",- dedi ol.
Memlekettik boryshtyń 73,3 protsentin úkimet qaryzy qurap otyr. Iaǵni 10,4 trillion teńge nemese JIÓ-niń 18,2 protsenti.
"Úkimet qaryzynyń ósýi respýblikalyq biýdjettiń tapshylyǵymen bailanysty. Óitkeni sońǵy jyldary respýblikalyq biýdjet tapshylyqpen bekitilip júr, tiisinshe úkimet beresheginiń ósýi zańdylyq", — dedi Beketaev.
Al memlekettik boryshtyń 25,7 protsentin Ulttyq banktiń qaryzy quraǵan. Absoliýttik mánde 3,6 trillion teńge. Jergilikti atqarýshy organdardyń qaryzy 150 milliard teńge boldy.
"Memleket kepildendirgen borysh 523 milliard teńgeni qurady. Qaryz indikatorlary uiǵarymdy mán aimaǵynda. Memlekettik borysh EAEO-ǵa múshe elder úshin bekitilgen JIÓ-niń 50 protsentinen aspaidy. Memlekettik borysh pen kvazimemlekettik sektor qaryzynyń jiyntyq mólsheri osy jyldyń 1 shildesindegi jaǵdai boiynsha 28,4 trillion teńgeni nemese JIÓ-niń 49,7 protsentin qurady. Úkimettiń syrtqy qaryzy memleket kepildendirgen syrtqy qaryz ben kvazimemlekettik sektordyń boryshyn esepke alǵanda jiyntyq mánde 39 milliard AQSh dollaryn qurady. Bul ulttyq qordyń valiýtalyq aktivterinen aspaidy", — dedi vitse-ministr.
