Qazaqstan shekarasyn zańsyz kesip ótken Qytai azamaty ustaldy, dep habarlaidy Sputnik.
Ótken túni Qazaqstan Respýblikasy UQK Shekara qyzmetiniń Jarkent shekara otriady men soǵan qarasty "Qorǵas", onymen qaptaldas "Basqunshy", "Yntaly" zastavalary túnniń jarymyna deiin uiyqtamady. Oǵan sebep saǵat 23. 05-te kelip túsken dabyl belgisi bolatyn.
Oqiǵa ornyna dereý attanǵan dabyl toby tikenek symdy qorshaýdy buzyp-jara bizdiń elge kirgen bir adamnyń izin anyqtap, oǵan izshil itti saldy. Bul ýaqytta otriadtyń jeke quramy men qaptaldas zastavalar da dabyl belgisimen kóterilip, jolǵa shyqqan bolatyn.
"Arada bir jarym saǵattan sál asqanda, saǵat 01.42-de oń qaptaldaǵy "Basqunshy" shekara zastavasy bastyǵynyń orynbasary bastaǵan tórt shekarashy sarbaz "Rom" atty qyzmettik ittiń kómegimen ishke qarai 5200 metrge kirip úlgergen "shaqyrylmaǵan qonaqty" qýyp jetip, ustady", — dep jazylǵan UQK ShQ baspasóz qyzmeti taratqan habarlamada.
Ustalǵan adam han tilinde ǵana sóileidi. Jolqapshyǵynan 1990 jyly týǵan QHR azamatynyń tólqujaty, 3 dana gazdy ottyq, azyq-túlik qory tabyldy. Shekara jolaǵyndaǵy iz sol adamǵa tiesili ekendigi anyqtalǵannan keiin, saǵat 03.20-da shekarashylarǵa dabyldyń aiaqtalǵany habarlandy.
