Aýyl sharýashylyǵy ministrliginde Saýda jáne integratsiia ministrligi, Nur-Sultan ákimdigi jáne Qoǵamdyq tamaqtaný qaýymdastyǵy ókilderiniń qatysýymen biznes sýbektilerin qanttyń qajetti kólemimen qamtamasyz etý máseleleri boiynsha kezdesý ótti, dep habarlaidy "Ult aqparat" primeminister.kz saityna silteme jasap.
Kezdesýge aýyl sharýashylyǵy vitse-ministri Jeńis Óserbai, ISM Saýda komitetiniń tóraǵasy Erjan Qazanbaev, sondai-aq Qaýymdastyq tóraǵasynyń keńesshisi Veronika Nurpeiisova qatysty.
Eske sala keteiik, keshe Qoǵamdyq tamaqtaný qaýymdastyǵy qantpen qamtamasyz etýdegi qiyndyqtarǵa bailanysty qoǵamdyq tamaqtaný kásiporyndarynyń bankrotqa ushyraýy múmkin ekenin málimdegen bolatyn.
Talqylaý qorytyndysy boiynsha shaǵyn jáne orta biznesti qosymsha qoldaý jáne qoǵamdyq tamaqtaný obektileriniń indýstriialyq qant qajettiligin tolyq qamtamasyz etý týraly sheshim qabyldandy.
Qoǵamdyq tamaqtaný obektilerine basymdyq bere otyryp qant jetkizýdi uiymdastyrý úshin búgingi kúnniń ishinde olarǵa qajetti qant kólemi aiqyndalatyn bolady.
Birinshi kezeńde halyq sany neǵurlym kóp úsh aimaqqa myń tonnadan astam qant jetkiziletin bolady.
«Aýyl sharýashylyǵy ministrligi qanttyń qosymsha kólemin Nur-Sultan, Almaty jáne Shymkent qalalaryna jóneltedi. Osy qalalardaǵy shaǵyn biznes ókilderi qanttyń qajetti kólemin ala alady. Sondai-aq Qaýymdastyq basqa qalalar boiynsha tizim jasap, qajetti qant kólemin esepteidi. Bul oraida Qaýymdastyq pen ákimdikter atalǵan qantty berý algoritmin ázirleidi», — dedi keńes sońynda aýyl sharýashylyǵy vitse-ministri Jeńis Óserbai.
