QR Mádeniet jáne sport ministri Arystanbek Muhamediulynyń aitýynsha, karta aldymen albom úlgisinde shyǵady, dep habarlaidy QazAqparat tilshisi.
«Qazirgi kezde atalǵan karta boiynsha jumys tobyn jasaqtap jatyrmyz. Abyroi bolǵanda, bizde ólketanýshylar men geograftar qaýymdastyqtary bar. Budan bólek, ózdigimen ekspeditsiiaǵa shyǵyp júrgen ǵalymdarymyz da az emes. Al naqty kieli jerlerdiń kartasy jaiynda aitar bolsaq, jyldyń aiaǵyna deiin biz atalǵan kartanyń albomyn daiyndap shyǵaramyz. Árine, biz ony elektrondy formatqa da aýystyratyn bolamyz», - dedi Muhamediuly jýrnalisterge bergen suhbatynda.
Onyń aitýynsha, Qazaqstannyń kieli jerleriniń kartasyn jasaýǵa kóp aqsha ketpeidi. Ministrlik barlyq shyǵyndardy óz biýdjetinen óteidi. «Kartany jasap shyǵarý úshin aqsha emes, aqparat kóp kerek. Árine, árbir tarihi jerdiń ańyz-áńgimelerin jaza bersek, oǵan ýaqyt ta, kartanyń kólemi de jetpeidi. Sondyqtan aishyqty ári qyzyqty degen jerlerdi iriktep alǵanymyz jón. Endi, aldaǵy bir-eki aidyń ishinde biz ol kartanyń elektrondy nusqasyn kórsete alamyz», - dep atap kórsetti ministr.
Aita keteiik, Qazaqstanyń kieli jerleriniń kartasy Memleket basshysynyń «Bolashaqqa baǵdar: rýhani jańǵyrý» atty maqalasynda aitylǵan negizgi ideialardy júzege asyrý aiasynda qolǵa alynyp otyr. «Osy turǵyda, Prezident Ulytaý tórindegi jádigerler keshenin, Qoja Ahmet Iasaýi mavzoleiin, Tarazdyń ejelgi eskertkishterin, Beket ata kesenesin, Altaidaǵy kóne qorymdar men Jetisýdyń kieli mekenderin jáne basqa da jerlerdi ózara sabaqtastyrýdy tapsyrdy. Atalǵan jerlerdiń barlyǵy - bizdiń ulttyq biregeiligimizdiń keregesi», - deidi ministr Muhamediuly.
