Qazaqstannyń Halyq ártisi, «Qurmet», «Parasat» ordenderiniń iegeri Quman Tastanbekov dúnieden ozdy. Bul aqparatty M.Áýezov atyndaǵy Qazaq memlekettik akademiialyq drama teatrynyń baspasóz qyzmeti rastady, dep habarlaidy "Ult aqparat".
«Búgin Quman aǵamyz dúnieden ótti. Qoshtasý rásiminiń ýaqyty áli belgilengen joq. Ol 1969 jyldan bastap, M. Áýezov atyndaǵy akademiialyq drama teatrynda qyzmet etip kelgen-tuǵyn», - dedi baspasóz qyzmetindegiler.
Quman Tastanbekov 1945 jyly burynǵy Taldyqorǵan oblysynda dúniege kelgen. Qazaqstannyń Halyq ártisi, Qazaqstan Lenindik komsomol syilyǵynyń laýreaty, «Qurmet», «Parasat» ordenderiniń iegeri.
1969 jyly Qazaq Memlekettik Qurmanǵazy atyndaǵy konservatoriianyń teatr fakýltetin bitirgen.
Ol sahnada O. Bókeevtiń «Qulynym menińdegi» - Jan, «Vetnam juldyzyndaǵy» - Ushqysh, Á. Nurpeiisovtiń «Qan men terinde» - Táńirbergen, Ǵ. Músirepovtiń «Aqan seri-Aqtoqtysynda» - Aqan, S. Muqanovtyń «Shoqan Ýálihanovyndaǵy» - Shoqan, T. Ahtanovtyń «Antynda» - Saýran, M. Áýezovtiń «Aiman-Sholpanynda» - Álibek, T. Ahtanovtyń «Joǵalǵan dosynda» - Estemesov, Sh. Aitmatovtyń «Ana-Jer-anasynda» - Qasym, «Aq kemesinde» - Qulbek, E. Dombaevtyń «Bizdiń klastyń qyzdarynda» - Tólegen, B. Muqaidyń «Ómirzaiasynda» - Tsezar, F.Erveniń «Túlki bikeshinde» - Floridor, N. Hikmettiń «Farhad-Shyrynynda» - Farhad syndy negizgi rólderdi somdady.
Teatr repertýarynda júrip jatqan spektaklderde - Shahimardenniń «Tomirisinde» - Balqash, S. Toraiǵyrovtyń «Qamar sulýynda» - Omar, S. Muqanovtyń «Móldir mahabbatynda» - Jaqypbek, T. Nurmaǵanbetovtiń «Eski úimen qoshtasýynda» - Jalǵasbek, B. Jákievtiń «Júreiik júrek aýyrtpaiynda» - Qariia, M. Zadornovtyń «Kúieýińizdi satyńyzshy» komediiasynda - Andrei, G. Gaýptmannyń «Ymyrttaǵy mahabbatynda» - Shteinits, Shekspirdiń «Romeo men Djýlettasynda» - Montekki, D. Kobýrnnyń (aýd. E. Amanshaev) «Jynoinaǵynda» - Veller Martin (rej. E.A manshaev, A. Kákisheva), A. Chehovtyń «Apaly-sińlili úsheý» dramasynda (aýd. Á. Bópejanova, rej. R. Andriasian, A. Kákisheva) - Kýlygin rolderin somdaǵan.
«Q. Tastanbekovtiń kino óneri salasyndaǵy eńbegi de eleýli. Ol ataqty «Qyz Jibek» filmindegi (rejisser S. Qojyqov, stsenarii Ǵ. Músirepov, redaktor A. Súleimenov, 1970 j.) Tólegen rólimen «juldyzy janǵan» akter. Budan keiin de kóptegen filmge - «Bizdiń Ǵani»» (1971), «Qys - sýarmaly kezeń emes» (1972), «Munda aqqýlar ushyp keledi» (1973), «Aqqýlar jańǵyryǵy» (1974), «Qosymsha saýaldar» (1978), «Aǵamnyń qalyńdyǵy» (1979), «Provintsialdy roman» (1981), «Qarasha qazdar qaitqanda» (1981), «Órnek» (1982), «Alań jieginde» (1982), «Kimsiń sen, salt atty?» (1987),«Adam-jel» (2003), «Mahambet» (2008) t.b. túsken», - delingen Áýezov teatrynyń málimetinde.
Akterdiń ánshilik óneri de bar. Ol birneshe spektaklde án oryndaidy.
Qazaqstannyń halyq ártisi (1993), KSRO Kinematografister odaǵynyń múshesi (1991), Qazaqstan Lenindik komsomol syilyǵy laýreaty (1976). «Qurmet» ordeniniń iegeri (2008), QR Táýelsizdik kúnine orai, Almaly aýdanynyń áleýmettik, ekonomikalyq, qoǵamdyq, saiasi ómirine qosqan úlesi, joǵary kásibi biliktigi men azamattyq belsendiligi úshin marapattaldy.
