QR Premer-Ministriniń orynbasary Roman Skliar elimizdiń birqatar óńirinde turmystyq qatty qaldyqtardy basqarý infraqurylymy ázirlenip jatqanyn aitty, dep habarlaidy QazAqparat.
«Jergilikti atqarýshy organdar qaldyqtardy paidalanýǵa qajetti infraqurylymdardy qurý baǵytynda jumys istep jatyr. Máselen, Atyraý oblysynda turmystyq qatty qaldyqtardy basqarýǵa arnalǵan 2 keshenniń qurylysyna jer ýchaskesi bólindi. Olarda turmystyq qatty qaldyqtardy suryptaý, qaita óńdeý jáne qaita paidalaný kózdelgen. Batys Qazaqstan oblysynda Oral qalasyndaǵy turmystyq qatty qaldyqtar poligondary aýmaǵynda jyldyq qýaty 100 myń tonna, al Aqsai qalasynda táýliktiń qýaty 25 tonna bolatyn qoqysty suryptaý jelisi ornatylǵan. Buǵan qosa, Oral (70 gektar) jáne Aqsai (40 gektar) qalalarynda turmystyq qatty qaldyqtarǵa arnalǵan jańa poligondar salýǵa jer bólingen», - delingen Roman Skliardyń Májilis depýtattary saýalyna bergen jaýabynda.
Onyń dereginshe, Pavlodar qalasyndaǵy turmystyq qatty qaldyqtar poligonynyń amaǵynan 43,5 gektar jer ýchaskesi bólingen. Oǵan qoqys óńdeitin zaýyt salý kózdelgen. Al Qyzylorda oblysynyń Jańaqorǵan eldi mekeninde jańa poligon salýǵa 20 gektar jer bólinip, tehnikalyq-ekonomikalyq negizdemesi jasaldy. Qazirgi ýaqytta memlekettik saraptamadan ótip jatyr.
«Aqmola oblysynda oblystyq 6 óńirinde suryptaý jelileri bolatyn turmystyq qatty qaldyqtar poligondary qurylysyna arnalǵan 7 jobanyń tehnikalyq-ekonomikalyq negizdemesi ázirlendi. Sonymen qatar Shýche qalasynda turmystyq qatty qaldyqtarǵa arnalǵan eski poligondy qalpyna keltirý tehnikalyq-ekonomikalyq negizdemesin ázirleý jumysy júrgizilip jatyr», - dedi vitse-premer.
