kollaj: AzattyqRuhy
Qazaqstannyń Tuńǵysh Prezidenti Nursultan Nazarbaevtyń nemere inisi Qairat Satybaldynyń burynǵy áieli Gúlmira Satybaldy sotta jaýap berip jatyr. Ol Tursenǵali Alagózovtiń kompaniiasyn tartyp almaǵanyn aitty, dep habarlaidy Halyq Uni saity.
Jaýap alý barysynda advokat Ásemgúl Danialova Gúlmira Satybaldydan «Alagózov sizge qandai aiyp taqqanyn kórip otyrsyz. Alagózovtiń ózimen jáne burynǵy áielimen qalai tanysqanyńyzdy aityp berseńiz» dep surady.
«Alagózov men reiderlik jasady dep aiyptap otyr. Ol meni kompaniiasyn tartyp aldy dep aiyptady. Moraldyq shyǵyndy nege ekeni belgisiz 135 mlrd teńge dep eseptep otyr. Men mundai aqsha týraly tipti memlekettik biýdjette de estigen emespin. Men sekildi Qazaqstannyń qarapaiym azamatynda ondai kólemdegi qarajat qaidan bolsyn? Men kelispeimin. Eshqandai ózinshe bilik etý bolǵan joq, men onyń kompaniiasyn tartyp alǵan joqpyn», - dep jaýap berdi Gúlmira Satybaldy.
Onyń aitýynsha, Qairat Satybaldymen ajyrasqanyna 20 jyl bolǵan.
«2002 jyldyń jeltoqsanynda aiyryldyq. Nege jatqa biletinimdi aitaiyn. Sebebi ol kezde men memlekettik organda jumys istedim, deklaratsiia tapsyrýym qajet edi. Qairat maǵan aitpai ajyrasty. Sodan keiin balalarymdy alyp ketip qaldym. Meniń oǵan eshqandai ókpem joq. Qairat Satybaldy prezidenttiń nemere inisi, barlyǵy onyń aldynda qurdai jorǵalady. Men únemi ekinshi orynda boldym», - deidi Satybaldy.
Aitýynsha, ózi kópbalaly otbasydan shyqqan.
«Men kópbalaly otbasydan shyqqanmyn. Ata-anamnyń 10 balasy bar, men jetinshi perzentimin. Sol sebepti Qairat siiaqty jigittiń meni áiel etip alǵanyna qýandym. Men Qairattan úsh bala taptym. Búkil álemge meniń úsh balam bar ekenin maqtanyshpen aitamyn. Men olardy laiyqty túrde jetkizdim. Bala tapqanym úshin qazir jan-jaqtan jazalap jatyr», - dedi Gúlmira Satybaldy sot zalynda jylap.
Onyń sózinshe, 2018 jyly uly otbasy qurmaq bolǵan. Sol kezde Tileýqabyl Abdýllin (qazaqstandyq biznesmen – avt.) shaqyryp, «Galanz Bottlers» jáne «Maxi chai» kompaniialary bar ekenin aitqan.
Oǵan deiin kompaniia shyǵaratyn ónimdi tutynǵan emespin, men únemi durys tamaqtanýdy qoldaimyn. Sol kezde ol (Tileýqabyl Abdýllin – avt.) meni Liaisira Marat (Tursenǵali Alagózovtiń birinshi áieli – avt.) pen Ildana Ǵanimen (Liaisira Marattyń sińilisi – avtr.) tanystyrdy. Buryn onyń tegi Qazmambetova boldy, al qazir Ǵani. Sol kezde olar kompaniia týraly aityp, qaryzyn tólei almai otyrǵanyn aitty. Men qyzyǵýshylyq tanyttym, sebebi men óndirispen ainalysqandy jaqsy kóremin, - dedi Satybaldy.
Sondai-aq Gúlmira Satybaldy ul-qyzynyń Amerikada bilim alǵanyn atap ótti.
«2002 jyly ajyrastym. Uzaq ýaqyt memlekettik qyzmette jumys istedim. Ortalyq sailaý komissiiasyna maman bolyp jumysqa turdym. Sodan keiin Konstitýtsiialyq keńeste jumys istedim. Memlekettik basqarý akademiiasyn bitirip, Bilim ministrligine aýystym. Ulym 16 jasqa tolǵan soń Amerikaǵa kettim. Ul-qyzymnyń jaqsy bilim alǵanyn qaladym, ózim tildi meńgerdim. Qairat Satybaldymen aralaspadym dep aita almaimyn. Qarym-qatynasta boldyq jáne odan talap ettim. Ákesi retinde ol balalaryn qamtamasyz etti. Oqýy men páter aqysyn tóledi, úsh balamyz Amerikadaǵy mektepti támamdady. Al joǵary bilimdi Qazaqstanda aldy. Olardyń laiyqty azamat bolyp óskenin qaladym. Qairat Satybaldynyń áieli bolyp, odan bala tapqanym úshin dál osylai saiasi qýdalaýǵa ushyraimyn dep eshqashan oilamappyn», - dedi ol.
Aitýynsha, sodan keiin aqshany qaidan alaryn bilmegen. Sol kezde is boiynsha jábirlenýshiniń biri Aigúl Mekesheva burynǵy kúieýi men qudalarynan aqsha suraýdy usynǵan.
«2018 jyly qyzym Arýjan Qairat aýqatty adamǵa turmysqa shyqty. Qairat Satybaldydan da aqsha suradym, biraq ol bermedi. Sodan keiin qudalarymnan kómek suradym. Olar 650 mln teńge berdi. Qurmetti sot, men eshkim bilmeitin derekterdi aityp jatyrmyn. Sondai-aq meniń shotymnan «Galanz Bottlers» shotyna 200 mln teńge tústi. Alagózov te, Mekesheva da muny biledi», - dedi Gúlmira Satybaldy.
Aita keteiik, Gúlmira Satybaldyǵa Qylmystyq kodekstiń 389-babynyń 3 jáne 4 bóligi (ózinshe bilik etý), 28-babynyń 3-bóligi 1 jáne 8 tarmaǵy (adamdardy paidalaný arqyly qylmystyq quqyq buzýshylyq jasaǵan adam oryndaýshy dep tanylady), 125-babynyń 2-bóliginde (adamdar tobynyń aldyn ala sóz bailasýy arqyly jáne paidakúnemdik nietpen adamdy urlaý) kórsetilgen qylmysty jasady degen aiyp taǵylǵan.
Sotta Gúlmira Satybaldy ózine taǵylǵan aiypty moiyndamady.
Aiyptaý aktisine sáikes, 2020 jyldyń qyrkúieginde Satybaldy Alagózovke tiesili aktsiialar paketin zańsyz iemdengen. Sodan keiin Satybaldy Mekeshevanyń menshigindegi «Maxi Bottlers» úlesiniń 75%-yn basqa senimdi tulǵaǵa qaita jazýdy tapsyrǵan. Alaida aldyn ala ýáde bergen kompaniia aktsiialarynyń 5%-yn Mekeshevaǵa berýden bas tartqan.
Sodan keiin Satybaldy Mekeshevanyń óz erkimen aktsiiany jazyp bermeitinin túsinip, ony urlaý áreketin uiymdastyrǵan. Mekeshevany urlap áketýdi jeke kómekshisi Batyrshaevqa tapsyrǵan. Al Batyrshaev bul iske óziniń úsh tanysyn tartqan.
