Aýa raiynyń qolaisyzdyǵyna bailanysty eki oblysta jol jabyldy, dep habarlaidy "Ult aqparat" "Qazgidromet" RMK-ǵa silteme jasap.
Aqmola oblysynda 14 qańtarda 23:30-dan bastap burqasynǵa bailanysty «Astana-Ereimentaý-Shiderti» (16-205 km, Astanadan Pavlodar oblysynyń shekarasyna deiin) avtojolynda barlyq kólik túrleri úshin qozǵalys shekteldi. Pavlodar oblysynda 14 qańtarda 23:50-den bastap «Astana-Shiderti» tas jolynyń bir bóligi (205-259 km, Shiderti eldi mekeninen Aqmola oblysynyń shekarasyna deiin) jabyldy.
Aita ketsek, keshe Qazaqstannyń úsh óńirinde aýa raiyna bailanysty eskertý jariialanǵan bolatyn.
Qańtardyń 15-i kúni túnde Mańǵystaý oblysynyń aimaǵynda -22°S aiaz bolady dep kútilýde. Sondai-aq, 15 qańtar kúni Ońtústik Qazaqstan oblysynda tuman túsip, kóktaiǵaq, boran bolady. Shyǵystan soqqan jel kúsheiip, jyldamdyǵy sekýndyna 15-20 metrge jetedi. 15-17 qańtar aralyǵynda Qyzylorda oblysynyń birqatar aimaqtarynda soltústik shyǵystan jyldamdyǵy sekýndyna 15-20 metr bolatyn jel soǵady.
