SIM Qazaqstannyń Reseige LHR, DHR kvazimemlekettik aýmaqtarynyń, sondai-aq Ýkrainanyń Zaporoje jáne Herson oblystarynyń qosylýy týraly referendýmǵa qatysty ustanymyn jariialady, - dep habarlaidy Tengrinews.kz.
"Ózin-ózi jariialaǵan LHR jáne DHR memleketteri men Zaporoje jáne Herson oblystarynyń áskeri ákimshilikteri Reseige qosylý týraly referendýmdar ótkizse, Qazaqstan memleketterdiń aýmaqtyq tutastyǵy, olardyń egemendik teńdigi jáne beibit qatar ómir súrý printsipterinen shyǵady. Bizdiń Prezident birneshe ret, sonyń ishinde BUU minberinen sóilegen sózinde osy dúniejúzilik ámbebap uiymnyń Jarǵysyna negizdelgen halyqaralyq quqyq qaǵidatyn buljytpai saqtaýdyń mańyzdylyǵy týraly naqty málimdedi", - dedi Qazaqstan SIM resmi ókili Aibek Smadiiarov.
Ol Jarǵyda BUU-ǵa múshe memleketterdiń beibitshilikti saqtaý jáne memleketterdiń aýmaqtyq tutastyǵyn saqtaý úshin jaýapkershiligi týraly aitylǵanyn aitty.
"Biz saiasi dialogty jolǵa qoiýǵa jan-jaqty kómek kórsetýge daiyn ekenimizdi taǵy da rastaimyz. Bul rette elimiz turaqtylyqty óńirlik deńgeide de, jahandyq deńgeide de saqtaýdy mańyzdy mindet dep sanaidy", - dedi Smadiiarov.
Eske salaiyq, jumada LHR, DHR, sondai-aq Ýkrainanyń Zaporoje jáne Herson oblystarynda Reseige qosylý týraly referendým bastaldy. Daýys berý 27 qyrkúiekke deiin jalǵasady.
