Qazaqstannyń daiyn taýarlary syrtqy naryqta suranysqa ie. Bul týraly Senattyń jalpy otyrysynda QR Premer-Ministri Asqar Mamin aitty, dep habarlaidy QazAqparat.
«Osy jyldyń 10 aiynyń kórsetkishteri boiynsha elimizdiń ekonomikasynda 3,5 paiyz ósim tirkelgen. Onyń ishinde negizgi draiverler óńdeý ónerkásibi 5,3, qurylys salasy 7,6 paiyz ósti. Sheteldik investitsiialar 30,4 paiyz artty. Taý-ken salasyn eskermegende negizgi kapitalǵa salynǵan investitsiialar 14 paiyzǵa artty. Al byltyr osy salalar boiynsha óńdeý ónerkásibi 4 paiyzǵa ósti. Qurylys salasy 11,6 paiyzǵa ulǵaidy. Iaǵni, byltyr da osy salalarda joǵary ósim bolǵan», - dedi Úkimet basshysy senatorlardyń saýalyna orai.
Onyń atap ótýinshe, shynaiy sektor ulttyq ekonomika turaqtylyǵynyń, básekege qabiletiniń faktoryna ainalǵan.
«Biyl óńdelgen taýar eksporty 25,5 paiyzǵa ósti. Iaǵni, bul taýarlarymyzdyń syrtqy naryqta suranysqa ie ekendigin bildiredi. Jalpy, biyl eksport 20 paiyzǵa artyp otyr. Demek, barlyq oń dinamika, qalpyna kelý dinamikasy anyq kórinip tur. Ekonomikanyń qalpyna kelý qarqynyn barlyq halyqaralyq qarjy institýty moiyndap otyr. Ótken jyly birde-birreitingtik agenttik bizge kredittik reitingti tómendetken emes. Kerisinshe, keibir kórsetkishter boiynsha ósim boldy. Kúni keshe ǵana Halyqaralyq valiýta qorynyń missiiasymen kezdestim. Olar biyl bizdegi ósim 3,8 paiyzdyq deńgeide bolatyndyǵyn boljaidy. Al tolyqtai alǵanda, ózge halyqaralyq qarjy institýttarynyń boljamy 3,8-4 paiyz deńgeiinde bolyp otyr. Keler jyly ekonomika ósimi 4,5 paiyzǵa deiin jetetindigi jaiynda boljam bar», - dedi Asqar Mamin.
