Qazaqstannyń birneshe oblysynyń bilim oshaqtarynda oqý protsesi toqtap tur, dep habarlaidy "Ult aqparat".
ShQO men Pavlodar oblystarynyń orta mektepterinde aiazǵa bailanysty sabaq toqtaǵanyna búgin úshinshi kún boldy.
Oblystyq bilim basqarmasynyń málimetine sáikes, 24 qańtar kúni qatty aiazǵa bailanysty Shyǵys Qazaqstan oblysynyń Óskemen qalasy men barlyq aýdandarynda 1-11 synyptar aralyǵynda 1-2 aýysymdar boiynsha sabaq toqtatyldy.
Pavlodar oblysynda da 1-11 synyptar aralyǵynda 1 aýysymdar boiynsha sabaq toqtatylǵan.
Búgin Qaraǵandy, Temirtaý jáne Balqash qalalarynyń 1-11 synyp oqýshylary sabaqqa barǵan joq.
Astana qalasy, SQO jáne Aqmola oblysynyń da 0-11 synyptary úilerinde otyr. Qostanai mektepterinde 0-9 synyptarǵa sabaq toqtatyldy. Sonmen qatar, Jambyl oblysynyń Moiynqum aýdanynda 15 mekteptiń bastaýysh synyptary sabaqtan bosatyldy.
Aqtóbe oblystyq tótenshe jaǵdailar departamenti jergilikti turǵyndarǵa SMS habarlama joldap, 24 qańtar kúni oblysta jeldiń jyldamdyǵy sekýndyna 28 metrge deiin jetetinin, saqtyq sharalaryn kúsheitý kerektigin eskertip jatyr. Boljam boiynsha, mundai jel Muǵaljar aýdanynyń territoriiasynda soǵady. Oblystyń ózge aýdandarynda jeldiń jyldamdyǵy sekýndyna 17-22 metrge deiin jetpek. Sol sebepti bul aimaqtarda da oqý protsesi toqtaýy múmkin dep kútilýde.
Al Almaty oblysy ákimdiginiń habarlaýynsha, aýa temperatýrasynyń 25 gradýsqa deiin tómendeýine bailanysty oblys mektepterinde bastaýysh synyp oqýshylaryna sabaq toqtatylǵan.
