Foto: UQK baspasóz qyzmeti
Ulttyq qaýipsizdik komiteti qarasha aiynda Almaty, Aqtóbe, Qonaev jáne Shymkent qalalarynda terrorizmdi nasihattady degen kúdikpen destrýktivti dini aǵymdardyń alty jaqtaýshysyn ustady, dep habarlaidy Ult.kz.
Tergeý málimetinshe, ustalǵandar áleýmettik jelilerde dini negizde shabýyldar jasaýǵa, kisi óltirýge shaqyrǵan, sondai-aq zaiyrly tártipke qarsy baǵyttalǵan materialdar taratqan.
Tintý sharalary kezinde olardyń úiinen atys qarýy, sýyq qarý jáne kóp kólemde dini ádebietter tárkilendi.
Sot sanktsiiasymen kúdiktiler qamaýǵa alyndy. QR Qylmystyq-protsestik kodeksiniń 201-baby 1-bóligine sáikes, tergeýdiń basqa derekteri jariia etilmeidi.
Budan bólek, 3 qarashada Aqtóbe oblysynyń turǵyny terrorizmdi nasihattaǵany úshin 7 jylǵa bas bostandyǵynan aiyrylǵany habarlandy. Úkim zańdy kúshine endi.
UQK málimetinshe, jyl basynan beri terroristik jáne ekstremistik áreketterge qatysty 83 adam ustalyp, 97 adam sottalǵan.
