Qazaqstannyń bilim berý júiesi qazirgi zamannyń talaptaryna tolyǵymen sai bolýy kerek.
Bul týraly búgin QR Parlamenti Senatynda ótip jatqan «Orta bilim berý júiesiniń jai-kúii, problemalary jáne zańnamalyq retteý perspektivalar» taqyrybyna arnalǵan parlamenttik tyńdaý barysynda Senat Tóraǵasy Qasym-Jomart Toqaev aitty, dep habarlaidy QazAqparat. «Búgingi parlamenttik tyńdaý halqymyzdyń bolashaǵy úshin asa mańyzdy máseleni talqylaýǵa arnalǵan. Elimizdegi orta bilim berý júiesiniń úilesimdi qyzmeti men mektepterdiń sapasy árbir otbasyna, ár azamatqa qatysy bar ekenin biz jaqsy bilemiz. Biyl Qazaqstan Prezidenti memleketimizdiń bolashaǵyn qamtamasyz etýge baǵyttalǵan elimizdiń úshinshi jańǵyrýy jónindegi baǵdarlamany engizdi. Damyǵan 30 eldiń qataryna ený jónindegi irgeli maqsatqa qol jetkizýge baǵyttalǵan bul baǵdarlamada adam kapitalynyń sapasyn jaqsartýǵa, sonyń ishinde bilim berý sapasyn arttyrýǵa airyqsha kóńil bólinip otyr», - dedi Qasym-Jomart Toqaev.
Sonymen qatar Senat Tóraǵasy Memleket basshysy bilim berý júiesin ekonomikalyq ósýdiń negizine ainaldyrý úshin onyń qyzmetin túbegeili ózgertý jóninde tapsyrma bergenin eske salyp ótti.
«Qazirgi kezde tehnologiialardyń qarqyndy damýy, ártúrli salaǵa innovatsiialardyń engizilýi, jappai tsifrlandyrý, jańa tehnologiialyq tártipke kóshý orta bilim júiesin damytý barysynda jan-jaqty eskerilýi tiis. Elimizdi jańǵyrtý jolyndaǵy mindetterdi oryndaýǵa barynsha qabiletti mamandardy daiyndap shyǵarý úshin Qazaqstannyń bilim berý júiesi qazirgi zamannyń talaptaryna tolyǵymen sai bolýy kerek», - dedi ol.
