QR Aýyl sharýashylyǵy vitse-ministri Gúlmira Isaeva birqatar óńirdegi epizootiialyq jaǵdai týraly baian etti, dep habarlaidy "Ult aqparat".
«Búginge deiin 47 eldimekende (25 aýdan men 5 oblysta) qus tumaýynan qustardyń qyrylý faktisi tirkeldi. Jeke úilerde 12 926 úi qusy, sondai-aq Soltústik Qazaqstandaǵy qus fabrikalarynda 41 myń qus qyryldy. Aimaqtardy bólip qaraityn bolsaq, SQO-da 27 aýdanda (11 aýdanda) qustyń qyrylý faktisi tirkeldi. Onyń ishinde qus tumaýy 23 eldimekende (8 aýdanda) rastaldy. Tiisinshe 17 qyrkúiekten bastap Aýyl sharýashylyǵy ministrligi Soltústik Qazaqstandaǵy jeti aýdannan jáne Aiyrtaý aýyldyq okrýginen qus ónimderin shyǵarýǵa ýaqytsha tyiym saldy», - dedi Gúlmira Isaeva OKQ-da ótken baspasóz máslihatynda.
Onyń aitýynsha, qus ónimderin syrtqa shyǵarýǵa tyiym salynǵan jeti aýdannyń qatarynda Timiriazev, Jambyl, Qyzyljar, Taiynsha, Shal aqyn, Ǵ.Músirepov jáne M.Jumabaev aýdandary bar.
«19-21 qyrkúiek aralyǵynda «Beskól» qus fabrikasynda 41 myńǵa tarta qus qyryldy. Aqmola oblysy týraly aitar bolsaq, 5 aýdannyń 9 aýylynda qustyń qyrylý faktisi tirkeldi. Jalpy 286 qus óldi. Tiisinshe 19 qyrkúiekten bastap Aqmola oblysynyń Jarqaiyń aýyldyq okrýginen qus ónimderin syrtqa shyǵarýǵa ýaqytsha tyiym salyndy. Odan bólek, Qostanai oblysynyń 6 aýdanynda osyndai jaǵdai tirkelip, ol jaqtarda 505 qus qyryldy», - dedi ol.
