Elimizdiń batys jáne ortalyq óńirlerinde nemis tehnologiiasy negizinde kún jáne jel elektr stantsiiasy jobasy qolǵa alynbaq. Bul týraly QR Syrtqy ister ministriniń orynbasary Roman Vasilenko málim etti, dep habarlaidy QazAqparat.
«Nemis kapitalynyń qatysýymen 600-den astam kásiporyn tabysty jumys istep jatyr. Bizdiń elimizge nemis kompaniialarynyń qyzyǵýshylyǵy arta túsýde. Sońǵy 15 jylda Germaniiadan Qazaqstanǵa kelip túsken tikelei investitsiialar 5,3 mlrd dollar qurady. Onyń basym bóligi (shamamen 80%) shikizattyq emes sektorǵa, aýyl sharýashylyǵy, qurylys, densaýlyq saqtaýǵa, kólik logistikasyna baǵyttaldy», - dedi Roman Vasilenko ministrlikte ótken baspasóz máslihatynda.
Onyń aitýynsha, búginde Saran qalasynda nemistiń «Goldbeck Solar» atty firmanyń qatysýymen Ortalyq Aziiadaǵy iri, qýaty 100 megavattyq kún elektr jobasy iske qosyldy.
«Jaqyn arada «SVEVIND» Drezden kompaniiasy batys jáne ortalyq Qazaqstannyń dalasynda jalpy qýaty 45 gigavatt jel jáne kún elektr stantsiialaryn salý boiynsha iri jobaǵa kirisedi. Qazaqstan - nemis kásipkerleri men investorlary úshin jańa múmkindikter mekeni, áleýeti joǵary. Ekijaqty investitsiialyq ahýaldy jetildire túsý arqyly ortaq jetistikte qol jetkizetinimizge senimdimin», - dedi ol.
