Qazaqstanda bir jyldyń ishinde abattandyrylǵan turǵyn úidi jaldaý quny 9, abattandyrylmaǵany 4 paiyzǵa qymbattady, dep habarlaidy energyprom.kz portaly.
Portal málimetinshe, 2021 jyldyń basynda Qazaqstan baspanany jaldaý quny boiynsha álem elderiniń reitinginde 138 memlekettik ishinde 107-orynǵa turaqtaǵan. Bul jalpy elimizde jalǵa alý qunynyń arzan ekendigin bildiredi.
Reiting Niý-Iorkke qaraǵanda elderdegi jalǵa alý quny qanshalyqty qymbat nemese arzan ekendigin baǵalaidy. Bul rette Niý-Iork indeksi 100-ge teń. Demek, eldiń indeksi 110 ball bolsa, onda jaldaý quny Niý-Iorkke qaraǵanda 10 paiyz qymbat degen sóz. Al 95 paiyz bolsa, demek amerikalyq megapoliske qaraǵanda bul elde jaldaý quny 5 paiyzǵa arzan. Qazaqstan indeksi 9,31 paiyzdy quraidy. Al baspana jaldaý quny eń joǵary elderdiń qatarynda Bermýd araly, Gonkong, Singapýr bar. Atalǵan reitingke sáikes, jalǵa beriletin eń arzan baspanany Aýǵanstannan tabýǵa bolady.
2020 jyldyń jeltoqsanynda Qazaqstanda abattandyrylǵan páterdiń jaldaý quny bir sharshy metrine 1,6 myń teńgeni qurady. Bul bir jyl burynǵy kórsetkishten 9,3 paiyzǵa qymbat. Iri qalalar men megapolister arasynda elordada páterdiń bir sharshy metriniń jaldaý quny 2,9 myń, Almatyda 2,3 myń, Aqtaýda 2 myń teńge. Eń tómeni Semei qalasynda tirkelgen. Bul qalada bir sharshy metr 1,2 myń teńgeni quraidy.
Al abattandyrylmaǵan baspananyń jaldaý quny ortasha eseppen sharshy metrine 848 teńge, iaǵni bir jyl burynǵy kórsetkishten 3,5 paiyzǵa qymbat. Mundai baspanalardy jaldaý Almaty men Nur-Sultan qalasynda sharshy metrine 1,6 myń teńge bolady. Al Taldyqorǵan qalasynda abattandyrylmaǵan páterdiń sharshy metrin 1,1 myń teńgege jaldaýǵa múmkindik bar.
