Qazaqstannyń bank sektoryndaǵy aktivterdiń sapasyn baǵalaý aiaqtaldy, dep habarlaidy "Ult aqparat" Ulttyq bank baspasóz qyzmetine silteme jasap.
Qazaqstan Respýblikasy Prezidentiniń QR Úkimetiniń keńeitilgen otyrysynyń qorytyndysy boiynsha 2019 jylǵy 30 qańtarda bergen tapsyrmasyna sáikes QR Ulttyq Banki 2019 jylǵy 8 aida aýqymy jaǵynan buryn-sońdy bolmaǵan, qatysýshy bankterdiń jáne tutastai alǵanda búkil qarjy indýstriiasynyń jai-kúii týraly qoljetimdi aqparattyń sapasyn jáne mańyzyn aitarlyqtai jaqsartýǵa múmkindik bergen bank sektory aktivteriniń sapasyn baǵalaýdy uiymdastyryp, ótkizdi.
«Bankter aktivteriniń jalpy kóleminiń 87%-y jáne nesie portfeliniń 90%-y tiesili iri 14 banktiń aktivteriniń sapasy baǵalandy. Baǵalaýdyń ashyqtyǵy men obektivtiligin qamtamasyz etý úshin QRUB ASB-ny halyqaralyq konsýltantpen jáne táýelsiz aýditorlyq kompaniialarmen birlesip ótkizdi. Qazaqstannyń bank sektorynyń jai-kúii Eýropa Ortalyq bankiniń (EOB) ádisnamasyna sáikes zerdelendi, ol biryńǵai halyqaralyq sapa standarttarynyń saqtalýyna kepildik beredi jáne baǵdarlamanyń nátijelerine halyqaralyq qoǵamdastyq tarapynan senimdi qamtamasyz etedi»,- dep habarlady Ulttyq bank.
ASB qorytyndysy boiynsha esep daiyndaldy, ol qoldanylǵan tásildiń jalpy sipatyn, aktivter sapasyn júielik deńgeide baǵalaý nátijelerin jáne aldaǵy is qimyldardyń tizbesin qamtidy.
Aktivter sapasyn 2019 jylǵy 1 sáýirdegi jaǵdai boiynsha shoǵyrlandyrylǵan deńgeide baǵalaý nátijelerine sáikes (barlyq qatysýshy bankter nátijeleriniń agregatsiiasy) kapital tapshylyǵy baiqalmaidy; k1 jáne k2 normativteri ASB baǵdarlamasynyń nátijeleri eskerile otyryp júielik deńgeide artyǵymen oryndalýda.
Qazirgi kezde aktivter sapasyn baǵalaýdyń birinshi kezeńi aiaqtaldy. 2019 jylǵy qyzmet nátijelerin, qarjylyq jáne retteýshilik eseptilikti qalyptastyrý eskere otyryp, bankter retteýshi bergen usynymdardy negizge alyp, jan-jaqty sharalar josparlaryn ázirleidi. Bankterdiń árqaisysy boiynsha josparlar Retteýshiniń maquldaýyna jiberiledi. Kórsetilgen protsess 2020 jylǵy 15 aqpanǵa deiin aiaqtalady. Kelisilgennen keiin sharalardyń oryndalýyn retteýshi qatań qadaǵalap otyrady.
ASB-nyń ekinshi kezeńinde banktermen júrgizilgen jumystyń qorytyndy nátijelerin Ulttyq Bank 2020 jylǵy 28 aqpanda baǵdarlamaǵa qatysýshy bankter boiynsha beredi.
Sondai-aq ASB qorytyndysy boiynsha táýekelge baǵdarlanǵan qadaǵalaýdy jetildirýge jáne bankterdegi biznes protsesterdi jaqsartýǵa baǵyttalǵan júielik sharalar jaiynda bastama kóteriledi.
Qazaqstan Respýblikasy ekinshi deńgeidegi bankteri aktivteriniń sapasyn júielik deńgeide baǵalaý nátijeleri boiynsha esep Ulttyq Banktiń saitynda 2019 jylǵy 30 jeltoqsanda (búgin) saǵat 17:00-de ornalastyrylatyn bolady.
