Aǵymdaǵy jyldyń 9 aiynda eksport 950,5 mln dollardy qurady. Bul týraly Aýyl sharýashylyǵy ministri Erbol Qarashókeev málim etti, dep habarlaidy QazAqparat.
«Aǵymdaǵy jyldyń 9 aiynda eksport 950,5 mln dollardy qurady. Eksport kóleminiń ósimi 2,4%-ǵa jetti. Sút ónimderi boiynsha 2%-ǵa, makaron ónimderi boiynsha 37,4%-ǵa, kúnbaǵys maiy boiynsha 11,7%-ǵa ulǵaiý baiqaldy. Agroónerkásiptik keshen ónimderi eksportynyń jalpy kólemindegi óńdelgen ónim eksportynyń úlesi 37%-dy quraidy. Bul deńgeidi biz óndiris kólemin ulǵaitý jáne eksport úshin kedergilerdi joiý esebinen 70%-ǵa deiin eki eseleýge tiispiz», - dedi E. Qarashókeev Úkimet otyrysynda.
Eksporttyń negizgi baǵyttary – bul Eýraziialyq ekonomikalyq odaqqa múshe memleketter men Ortalyq Aziia elderiniń (Ózbekstan, Tájikstan), Aýǵanstannyń, sondai-aq Eýropa elderiniń (Germaniia, Italiia) dástúrli ótkizý naryqtary.
«Ulttyq joba aiasynda aýyl sharýashylyǵy ónimderin óńdeý salasyna investitsiialar tartýdy yntalandyrý úshin shyǵystardyń bir bóligin óteý boiynsha investitsiialyq sýbsidiialar, agroónerkásiptik keshen sýbektileriniń lizingi men kreditteri boiynsha syiaqy mólsherlemeleri, óńdeýshi kásiporyndardyń shikizat satyp alýǵa arnalǵan shyǵyndaryn sýbsidiialaý siiaqty memlekettik qoldaýdyń barlyq sharalary saqtaldy. Jalpy, Ulttyq jobany iske asyrý nátijesinde bes jyl ishinde tamaq ónimderin óndirý kólemin 1,5 esege ulǵaitý, sondai-aq salaǵa 700 mlrd teńgege deiin investitsiia tartý josparlanyp otyr, bul qosymsha 7 myń adamdy jumyspen qamtamasyz etedi», - dedi ministr.
