Balqash qalasyndaǵy Qazaqstan Áýe qorǵanysy kúshteriniń oqý-aviatsiialyq ortalyǵyna L-39 oqý-jaýyngerlik ushaqtary keldi. Memlekettik qorǵanystyq tapsyrys sharty sheńberinde ótken jyldyń sońynda olar óndirýshi zaýytqa jiberildi. Onda kúrdeli jóndeý jumystary júrgizilip, jańǵyrtýdan ótti. Bul týraly "Ult aqparat" QR Qorǵanys ministrligine silteme jasap habarlaidy.
Modernizatsiia barysynda ushaqtarǵa jańa tsifrlyq avionika, katapýlttaý júieleri, bailanys jáne obektivti baqylaý quraldary ornatyldy.
L-39 kýrsanttardy kúndiz jáne túnde qarapaiym jáne kúrdeli meteojaǵdailarda, ushý tehnikasyna bastapqy oqytýǵa, jaýyngerlik qoldaný elementterin oqytýǵa, sondai-aq oqý oryndary men áskeri bólimderdiń ushqyshtar quramyn jattyqtyrýǵa arnalǵan.
Kýrsanttarǵa áýe kemesin meńgerýge tájiribeli ushqysh-nusqaýshylar kómektesedi.
– Jalpy alǵanda L-39 ushaǵymen ushý, aviatsiiany meńgerýdegi alǵashqy qadam bolyp tabylady. Árbir kýrsant úshin jeke ózi ushý – óte mańyzdy sát. Bul ol bolashaqta qarapaiym, kúrdeli pilotaj jasaý, bulttarda, tómen biiktikte, jerústi jáne áýe nysanalary boiynsha jaýyngerlik qoldanýǵa ushý syndy kezeńderge qol jetkize alady degendi bildiredi, – dep atap ótti oqý-aviatsiia ortalyǵy komandiriniń orynbasary podpolkovnik Maqsat Burataev.
Aero L – 39 Albatros – ushqyshtar quramyn daiarlaýǵa arnalǵan reaktivti oqý-jaýyngerlik ushaǵy. Keibir modifikatsiialaryn jeńil shabýyldaýshylar men joiǵysh ushaqtar retinde paidalanýǵa bolady. 2018 jylǵy jaǵdai boiynsha ol álemniń 30-dan astam elinde paidalanylǵan, ushý ýchilisheler kýrsanttaryn daiarlaýǵa arnalǵan negizgi mashinalardyń biri bolyp tabylady.
Reaktivti qozǵaltqysh 6500 m biiktikte 760 km/saǵ jyldamdyqqa jetýge múmkindik beredi. Ushaqtyń qarý-jaraǵyna bombalaýshy, basqarylmaityn zymyran qarýy jáne basqarylatyn zymyrandyq oqý qarýy, kózdeý jáne foto baqylaý jabdyqtary kiredi. Bul tik shúiilý kezinde 50-100 kg kalibrli erkin túsetin oq-dárilermen maqsatty bombalaýdy, S-5 tipti basqarylmaityn zymyrandarmen maqsatty túrde oq atýdy, imitatorlardy qoldana otyryp, áýe nysanalary boiynsha basqarylatyn zymyrandardyń iske qosylý imitatsiiasyn oryndaýǵa múmkindik beredi.
