Qazaqstannyń RHBQ áskerleri jańa úlgidegi arnaiy tehnikalarmen tolyqty, dep habarlaidy Qorǵanys ministrligi.
Radiatsiialyq, himiialyq jáne biologiialyq qorǵaý áskerleriniń jaraq quramyna biologiialyq barlaý mashinalarynyń zamanaýi keshenderi kelip tústi.
«Qaýipsiz el» ulttyq jobasyn iske asyrý aiasynda Qorǵanys ministrligi Qazaqstan áskerin tehnikalyq men jaýyngerlik jaraqtandyrý máselelerin pysyqtaýda. Otandyq úlgidegi qarý-jaraq ázirleý basym baǵyt bolyp tabylady.
Otandyq «OTS NETWORK» kompaniiasy biologiialyq barlaý keshenderin ázirlep shyǵardy. Olar áskerlerdiń qajettilikterine qarai ziiatkerlik aqparattyq tehnologiialardy qoldana otyryp jobalandy.
Biologiialyq sipattaǵy tótenshe jaǵdai aýmaǵyndaǵy arnaiy tehnika patogenderdi anyqtaý jáne olardy shuǵyl taldaý úshin zerthana jaraǵymen, jedel túsirilim júrgizýge qajetti sholý beinekamerasymen jabdyqtalǵan. GPS/Glonass terminalynyń biologiialyq zaqymdaý aimaqtarynyń derekterin tirkeý jáne jerseriktik bailanys júiesi arqyly málimetterdi jedel berý múmkindigi bar.
Qazirgi ýaqytta mobildik keshenderdi jinaqtaý men jumysqa qabilettiligin tekserý synaqtary aiaqtaldy. Jeke quram olardy paidalanýdy oqyp-úirendi. Jýyrda arnaiy jabdyq maqsatqa sáikes qoldaný úshin áskerlerge jiberiledi.
